Üftâdesin o südde-i gerdûn-cenâbda
Ey dil yegâne rütbesin el-hak bu bâbda
Eşkümle yâd-i gerd-i hatı oldı hem-çü hâl
Merdüm degül miyâne-i çeşm-i pür-âbda
‘Ukde-i merdümek-i çeşm o ruh-i aldadur
Nâhun-i dest-i nezâre girih-i hâldedür
Reng-i hüsni hat-i nev-hîz perîde idemez
Mevc-i pervâz-i hümâ cünbiş-i şeh-bâldedür
Urûk-i gül-büne hâr oldı nişter-zen tabîbâsâ
Güli müstagrak-i hûn itdi çeşm-i ‘andelîbâsâ
Der-âgûş olmaz ol âhû-yi vahşî ictinâb eyler
Dil-i zârı ider ser-geşte Kays-i nâ-şikîbâsâ
Vahdet-güzîn-i gûşe-i Kâf-i kanâ’at ol
‘Ankâ gibi güşâde-per-i evc-i şöhret ol
Nazm eyle rişte-i müjeye dürr-i eşküni
Dest-i nigehle sübha-şümâr-i nedâmet ol
Vâ’iz-i câmi’-i matbû’-i Süleymâniyye
Fâzıl-i nâdire-dân Himmet Efendi-zâde
Vâsıl-i sırr-i Hudâ hazret-i şeyh ‘Abdu'llâh
Mürşid-i kâmil ü himmet-res-i her üftâde
Vücûhun her birine bir ‘inâyet ârzûsıyla
Sekiz vech ile târîh eyledüm bu beyt-i hemvârı
Revânı himmet ile aldı sultân Ahmed a’dâdan
Yine feth-i cedîd oldı hümâyûn eylesün Bârî
Yâd-i ruhsârunla bezm-i sîne gülşendür bu şeb
Revgan-i gülden çerâg-i dâg rûşendür bu şeb
Şîve-i müjgân-i yâre dîde-dûz-i hasretem
Câme-hâb-i râhatum leb-rîz-i sûzendür bu şeb
Yaşarsa merdüm-i çeşmüm misâl-i Nûh ider
Cihânı garka-i tûfân-i girye ser-tâ-ser
‘Aceb mü’essir olur baht-i vâj-gûnum kim
‘İkâl-i pây-i nesîm oldı rîsmân-i haber
Yegâne-pâdşâh-i heft-kişver husrev-i a’del
Ki nâmı zîb-i levh-i menkabetdür çerh-i nüh-tâka
Cenâb-i hazret-i hân Ahmed-i âdil kim evsâfı
Yazılmışdur cihânda cümle mevcûd olan âfâka
Yem-i hüsünde bakılmaz dem-i şinâh sana
İki kedû gibidür âftâb ü mâh sana
Nezâre eyler idüm rûyuna budur havfum
Virür ‘azâb girân-bârî-i nigâh sana
Bu şaire henüz hiç kimse yorum yapmadı. İlk yorum yapan sen ol!