Nedür sûdı bu bâzâr-i fenâda celb-i emvâlün
Gınâ virmez metâ’-i müste’ârı dûş-i dellâlün
Habâbâsâ girîbân-i sımâh-i zühdi çâk itdi
Şikest-i tevbeden âvâz-i nûş-â-nûşı şevvâlün
Ne feyzi zühd ü ne şeyh-i diyârdan gördük
O hâleti ki mey-i hoş-güvârdan gördük
Me’âl-i ‘ukde-i pîçiş-nümâ-yi ümmîdi
Nühüfte-şîve-i ebrû-yi yârden gördük
Neş’e-i meyle ruh-i alunı gül gül görelüm
Açıl ey gonçe biraz rûyunı gül gül görelüm
Hem-çü ahvel idelüm seyr dü-bâlâ-yi cemâl
Nigehi çâk-hor-i tîg-i tegâfül görelüm
Nev-bahâr irdi yine oldı cihân hurrem ü şâd
Eyledi şûre-zemîn-i gamı firdevs-âbâd
Zîver-i rûy-i dükân oldı metâ’-i şâdî
Reste-bâzâr-i kesel oldı be-hem-pîç-i kesâd
Nigeh gül-bûse-çîn olmak ne mümkin la’l-i nâbından
Olur gül-pûş-i hayret surhî-i reng-i hicâbından
Bu gülşende nice erbâb-i dil gül-çîn-i kâm olsun
Nümâyândur sirişk-i dîde-i bülbül gül-âbından
Nigeh mümkin mi gül-çîn ola ruhsâr-i dil-ârâdan
Zihâm-i fevc fevc-i nûr-i enzâr-i temaşâdan
Fezâ-yi râstîde sâk-i sıdkı eyleyen teşmîr
Olur rif’atle berter nahl-i şîrîn-magz-i hurmâdan
Nizâmü'l-mülk-i ‘âlem sadr-i zî-şân sâhib-i devlet
Ki dergâh-i refî’inde e’âlî çihre-fersâdur
Vekîl-i mutlak ü dâmâd-i sultân Ahmed-i gâzî
Ki zât-i bî-nazîri mu’tenâ-yi dîn ü dünyâdur
O çeşm-i haste-tab’a ‘anber-i kuvvet-fezâdur hat
Şikest-i reng-i hüsn-i yâre hem-çün mûmyâdur hat
İder fevvâre-i hûn-âb-i hasret nevk-i müjgânı
Reg-i kâm-i nigâha turfe gerd-i müşksâdur hat
Odur halîfe-i Hak muktedâ-yi devlet ü dîn
Murâdı üzre döne dâ’imâ bu çerh-i berîn
Vücûdın eyleyüp âfâtdan masûn ü emîn
Mu’ammer eyleye hallâk-i âsmân ü zemîn
Sipihr tâkına târîh-i sâl-i yümn-âsâr
Ola ne dem gelûmuza kuhl-i gam âşinâ
Olmaz kelâm-i vasl-i dil-ârâ fem-âşinâ
Olmaz Mesîh ider ise eczâsını da sahk
Şemşîr-i gamze yaraları merhem-âşinâ
Bu şaire henüz hiç kimse yorum yapmadı. İlk yorum yapan sen ol!