Arpaeminizade Sami Şiirleri - Şair Arpae ...

Mey gibi virdi safâ reşha-i bârân-i bahâr
Çıkdılar hande-kunân rûy-i zemîne ezhâr

Cûylar halka-i hâtem olup etrâfında
Görinür fass-i zümürrüd gibi şekl-i kuhsâr

Mînâ-yi çeşm-i ‘ibrete vaz’ eyle lâleyi
Seyr eyle bezm-i devlet-i devr-i piyâleyi

‘Âlem-nümâ-yi her dü cihândur bahârda
Gör câm-i dûr-bîn-i şarâb-i dü-sâleyi

Miyân-i halka-i zülfinde hâl dâne gibi
Yine bu dâm-i hümâ sayd-i murg-i câna gibi

İdince germ-nigâh ol perî-’izâra olur
Hicâbdan ruh-i pür-tâbı şîşe-hâne gibi

Mu’azzam-pâdşâh-i mesned-ârâ-yi cihân-gîrî
Ki zât-i bî-nazîri oldı revnak-bahş-i mülk-i dîn

Yegâne-gevher-i ser-tâc-i nesl-i âl-i ‘Osmânî
Sezâvâr-i hilâfet âb-i rûy-i devlet-i pîşîn

1
Bend-i şelvârın çözüp öpsem küs-i nermi n'ola
Yarma şeftâlûsı bâg-i vuslatun gâyet lezîz
2
Tîr-i müjgânun ile âh-i derûndur sanma
Toz kopardı yine menzilgeh-i dilde tîrün

I
Mu’în ü yâverün her hâlde Rabb-i mecîd olsun
Sipihr-i köhne-sâlün devri ber-vefk-i ümîd olsun
Hemîşe tab’-i pâkün mazhar-i şevk-i cedîd olsun
Günün günden yeg olsun ‘ahd-i ikbâlün medîd olsun
Olup ‘îdün mübârek devlet ü ‘ömrün mezîd olsun

Müjdeler âfâka kim lutf-i Hudâ-yi lâ-yenâm
Virdi ser-tâ-ser cihâna inbisât-i şevk-i tâm

Rûşenâyî-bahş olup zulmet-nişînân-i gama
‘Arz-i mihr itmekde her gün çerh ber-vefk-i merâm

Müjem pây-i nigâh-i intizâra hârdur sensüz
Reh-i âmed-şud-i nezzâre nişterzârdur sensüz

‘Aceb mi olsa nâmem dâg dâg-i şu’le-i hasret
Kalem destümde murg-i âteşîn-minkârdur sensüz

Mukaddem itdi şeb-i rûze ‘işreti tesvîd
Çıkardı sonra beyâza sabâh-i ‘îd-i sa’îd

Tulû’ ider sanurum mihri burc-i mîzândan
O şûh pelle-i dûlâbda olınca bedîd

Mülûk-i ‘âlemün ser-tâcı sultân Ahmed-i gâzî
Ki gerd-i âstânı bâ’is-i zîb oldı şâhâna

O şâh-i şevket-âyîn-i cihânbân-i mu’azzam kim
Şeref virdi vücûdı hânedân-i âl-i ‘Osmâna