Arpaeminizade Sami Şiirleri - Şair Arpae ...

Sayd-i murg-i ma’nîye fikr-i müjendür tîrümüz
Gerdiş-i çeşm-i bütândur halka-i zih-gîrümüz

Rişte-i âmâlden kat’-i ta’alluk itmedük
Çeşm-i sûzendür çü ‘Îsâ halka-i zencîrümüz

Şehenşâh-i cihân-gîr ü hıdîv-i maşrık ü magrib
Ki te’sîr-i sadâ-yi şevketi ‘âlem-şümûl oldı

Cenâb-i hazret-i sultân Ahmed kim rikâbında
Perestârânı şâh-i Hind ü Özbek hem Mogol oldı

Şehenşâh-i cihân sultân Ahmed hân-i gâzî kim
Vücûd-i bî-nazîri mülk-i dîne oldı pîrâye

Yegâne-pâdşâh-i bahr ü ber hâkân-i ‘adl-âver
Cihânbân-i muzaffer tâcdâr-i âsmân-pâye

Şehenşâh-i mu’azzam tâcdâr-i kişver-i ‘âlem
Sikender-taht ü Dârâ-baht ü Husrev-raht ü Kisrâ-dâd

Cenâb-i pâdşâh-i bahr ü ber hân Ahmed-i sâlis
Kim oldı emrine ser-cümle şâhân-i cihân münkâd

Şeh-i kişver-güşâ sultân-i bî-hemtâ kim itmişdür
Hilâfet sırrını Hak ta’biye tab’-i reşîdinde

Cenâb-i şâh-i ‘âlem hazret-i hân Ahmed-i gâzî
Ki husrevler der-i cûdında oldı lutf ümîdinde

Semiyy-i fahr-i ‘âlem hazret-i aga-yi zî-şân kim
Odur ‘izzetle hâlâ kethudâ-yi sadr-i ‘âlî-câh

Muhammed nâm-i pâki bir vücûd-i muhteremdür kim
Cihân evsâf-i zâtın eylemişdür zîver-i efvâh

Şemşîrini takınca ne hoşdur o bel ince
Şemşîri nitâkınca nitâk ince belince

Kuhsâr-i mahabbetdeki râh ince bel ince
Bâr-i gam-i hicrân çekilür mi cebelince

Sene hisâbına bu âyet-i bedî’ ü celîl
Tevâfuk itdügi Sâmî yeter güvâh ü delîl
Kim ol hıdîv-i cihânbân-i bî-şebîh ü ‘adîl
Olur her işde muvaffak be-hakk-i zât-i celîl
Sipihr tâkına târîh-i sâl-i yümn-âsâr

Sensüz olur nigâhuma seyr-i çemen diken
Belki meşâm-i cânuma bûy-i semen diken

Tebrîd itdi benden o gül-rûyı rûzgâr
Her mûyum oldı serdî-i gamla diken diken

Ser-efrâz-i şeref-bahşâ-yi taht-i âl-i ‘Osmânî
Hudâvend-i mu’azzam tâcdâr-i memleket-pîrâ

Cihânbân-i memâlik şevket-i Dârâ vü İskender
Musahhardur ser-â-ser emr-i ‘âlî-şânına dünyâ