Arpaeminizade Sami Şiirleri - Şair Arpae ...

Tamâm itdükde bâbın oldı bu mısra’ dahı târîh
Yine ra’nâ yapıldı bâb-i zîbâ-yi Cebe-hâne

Sene 1142

Te’âla'llâh zihî âsâr-i feyz-i müste’ânî kim
Zuhûrından cihâna nev-be-nev zevk ü safâ geldi

Açıldı gül gibi dil-beste-i endûh iken ‘âlem
Gülistân-i meserretden nesîm-i cân-fezâ geldi

Te’âla'llâh zihî taht-i hümâyûn-i cihânbânî
Ki yâr ü yâveridür dâ’imâ te’yîd-i Rabbânî

Şehenşâh-i Ferîdûn-taht ü Dârâ-raht ü ‘âlî-baht
Cihânbân-i muzaffer tâcdâr-i mülk-i ‘Osmânî

Tecerrüd ile Mesîhâ felek-nişest oldı
Cihânda mâl ile Kârûnı gör ki pest oldı

Sun ol piyâleyi ey sâkî-i hakîkat kim
Cihâniyân kemîn neşvesiyle mest oldı

I
Temâşâna toyılmaz bir ‘aceb meh-pâresin cânâ
Güzelsin bî-bedelsin hüsn ile mümtâz-i ‘âlemsin
Olur seyr eyleyenler her bakışda ‘âşık-i şeydâ
Güzelsin bî-bedelsin hüsn ile mümtâz-i ‘âlemsin
II

Temâşâ-yi ruhından kâm-yâbem geşt-i bâg itmem
Şemîm-i verdini ser-şîşe-pîrâ-yi dimâg itmem

‘Aceb pervâneyem bu encümengâh-i tahayyülde
Hemîşe sûzişüm isnâd-i evzâ’-i çerâg itmem

Temûz irişdi cihân gark-i tef ü tâb oldı
Zemîn harâret ile vakf-i pîç ü tâb oldı

İdüp kemâl ile germiyyet-i hevâ te’sîr
Çekîde-i ‘arak-i gül-ruhân gül-âb oldı

Tenâsüb cilvegerdür ‘aşkda bî-gâne cem’ olmaz
Belî şem’ ile bülbül verd ile pervâne cem’ olmaz

Dili hemvâr ider silkü'l-le’âl-i gerden-i teshîr
Girih-pîçîde târa sübha-i sad-dâne cem’ olmaz

Tevâfuk itdi tekmîl-i binâ-yi bâbına târîh
Müzeyyen tarh-i vâlâ oldı bu bâb-i Cebe-hâne

Sene 1142

Tîre-tab’ı zişt-hû tercîh ider bî-kîneden
Seng-i hârâ hûb olur zengîye sâf âyîneden

Çün tehî-dest-i niyâz olmaz güher-çîn-i vusûl
Nakş-i mârun farkı ne ârâyiş-i gencîneden