Arpaeminizade Sami Şiirleri - Şair Arpae ...

‘Amûd-i subh gibi nûr-i ‘adl olup rûşen
Sevâd-i zulmet-i gam oldı mahv ‘âlemden
Kulûba virdi ziyâ âftâb-i re’y-i hasen
Gelince vakt-i perîşânî-i nücûm-i fiten
Sipihr tâkına târîh-i sâl-i yümn-âsâr

‘Aceb kimdür ki bir hâl üzre dâ’im
Sanur bâkî kalur dâr-i fenâyı

Gerek bay ü gedâ ger merd ü zendür
Koyup gitdi cihân-i bî-vefâyı

‘Aceb mi olsa rûyun nûr-bahş-i sîne-i meh-tâb
Olur hurşîdden pertev-gedâ âyîne-i meh-tâb

Çözince tügme-i sîmînini ol pençe-i hurşîd
Açıldı kufl-i elmâs-i der-i gencîne-i meh-tâb

Âferîn sad âferîn ey Kahramân-i rûzgâr
Bâreka'llâh bâreka'llâh ey vezîr-i kâm-kâr

Hayr-makdem ey yegâne-saf-der-i kişver-güşâ
Sâneka'llâh ey hudâvend-i Aristo-iştihâr

Âgûş-i dest-i nâtıkada tîşedür zebân
Kâvişger-i defîne-i endîşedür zebân

Vasf-i lebünde neş’e virür bâde-i suhan
Sâkî kalem piyâle dehen şîşedür zebân

Âh-i dil izhâr-i dâg ü çeşm-i pür-hûn istemez
‘Aşkı ol nahvet-perestüm perde-bîrûn istemez

Türş-rû gösterme cânâ zerdî-i rûyum görüp
‘İllet-i sevdâ-yi ‘âşık âb-i lîmûn istemez

Âh-i şerer-feşân ki dil ü sîneden çıkar
Pîçîde ejdehâ gibi gencîneden çıkar

İtsen nigeh bu câzibe-i hüsn ü ân ile
‘Aksün derûn-i hâne-i âyîneden çıkar

Aks-i ruhsârumla rûy-i yâri pür-zîb eyledüm
Ol hatâyî-kâgıd-i rengîni tezhîb eyledüm

Merdüm-i çeşmüm ruhun âzürde itmez ba’d ez-în
Darbet-i çûb-i müjeyle anı te’dîb eyledüm

‘Aksümle zâhir eyler o âyîne berbere
Olsam o ser-terâş ile bir kerre ber bere

Âhum tamâm o seng-dile eyledi eser
Sad âferîn ki sikkesini kazdı mermere

‘Âlemde yok hulûs ü mahabbet didükleri
Ser-mâye-i nifâkdur ülfet didükleri

Bîrûna sâz-kârî-i mihr der-i dünyedür (?)
Subha cebîn-güşâ-yi tarâvet didükleri