Arpaeminizade Sami Şiirleri - Şair Arpae ...

Bahâr irdi yine meyl itdi hâtır sûy-i gülzâra
Nigeh pîçîdedür zencîrek-i emvâc-i enhâra

Letâfetde leb-i cû bûs-i la’l-i yârden hoşter
Tarâvetde benefşe müştebih nev-hatt-i dildâra

Bahâr irdi yine sahn-i çemen pür-zînet ü ferdür
Bihişt-i câvidânîden cihânun lutfı berterdür

Bilür çeşm-i hakîkatle temâşâ eyleyen ‘ârif
Cemâl-i Hakka her berg-i çemen bir gûne mazhardur

Bakılmaz ol nigeh-i şâh-bâz-te’sîre
Ki nâhun-efgen olupdur hezâr nahçîre

Niyâz-i magfiret eyler günâh-i mey-hâra
Çemende berg-i rez efşürde olmadın şîre

Bâreka'llâh ey bihîn-serdâr-i meydân-i vegâ
Hayr-makdem ey yegâne-saf-der-i kişver-güşâ

Çekdi bir mûy-i za’îfâsâ gürûh-i düşmeni
Kabza-i tîgün meger kim ola seng-i keh-rübâ

Bâreka'llâh hânkâh-i Hâcı Bayram-i Velî
Kim anun kutb oldugında yokdur aslâ iştibâh

Mazhar-i feyz-i tarîkî şeyh Himmet hazreti
Bu makâmı eylemişdi cây-i ezkâr-i İlâh

Bâreka'llâh ol yegâne-mefhar-i erbâb-i cûd
Kim vekîl-i mâl-i sultân-i cihân oldı henûz

Dâ’imâ manzûrı mazlûmân-i zulmet-dîdegân
K'olmada nûr-i çerâg-i re’feti ‘âlem-fürûz

Bâreka'llâh zihî ‘âtıfet-i settârî
Gamun oldı mütevârî-i ‘adem âsârı

Kalmadı âyîne-i dilde küdûretden eser
Oldı saykal-zede-i dest-i safâ jengârı

Bâreka'llâh zihî sûr-i hümâyûn-safâ
Ki şeh-i ‘âleme şeh-zâdeyi lutf itdi Hudâ

Nice şeh mâ-hasal-i silsile-i ‘Osmânî
Nice şeh râbıta-i devlet-i dîn ü dünyâ

Beyâz-i dîde-i Yûsuf gibi o ten nâzük
Harîr-i nûr-i nigehden de pîrehen nâzük

Nigâh-i sâde yeter hayf ider öpen bedenin
Ki yek nefesle olur süst o penbeden nâzük

Bezm-i gülşende ki mutrib elini çenge kodı
Nagmesin savt-i hezâr ile bir âhenge kodı

Kârını sihr-i helâl eyledi meşşâta-i mey
Gül gibi yâsemen-i ‘ârızunı renge kodı