Arpaeminizade Sami Şiirleri - Şair Arpae ...

Bezm-i ma’nâda ne bu gûş ü ne bu dîde gerek
Gûş-i tahkîk-şinev dîde-i cân-dîde gerek

İdegör bâsırayı şâh-reh-i âgâhî
Reh-i bârîk-i nigeh sanma ki hâbîde gerek

Bezm-i pâk-i hüsne zîverdür o zülf ü hâl ü ruh
Dûd-i ‘anber micmer-i zerdür o zülf ü hâl ü ruh

Gerden-i billûrun üzre gûyiyâ bir şîşede
Sünbül ü şeb-bû gül-i terdür o zülf ü hâl ü ruh

Bezm-i vahdet kim olur tertîb-i rûh-efzâsı bir
Oldı câm ü sâkî vü mey-hâre vü sahbâsı bir

Sûret-i eşyâ me’âli müşterek elfâzdur
Nüsha-i kübrâ-yi insânun olur ma’nâsı bir

Bihîn-siyer cebeci kethudâsı aga kim
Odur ocaga viren pertev ü ziyâ hâlâ

Reşîd ü zâbit-i kâr-âzmûde-i âfâk
Salâh ü ‘iffet ile oldı şöhre-i dünyâ

Biz esîr-i ‘işretüz sâkîlerün meftûnıyuz
Beste-i zencîr-i mevc-i bâde-i gül-gûnıyuz

Pây-i humda câm-i mey işrâk-i feyz eyler bize
Bezm-i ‘aşkun neş’e-yâb-i ‘akl-i Eflâtûnıyuz

Bu sûziş görmedendür kim yanardı ülfet itseydük
O şem’-i hüsn ile pervâneveş germiyyet itseydük

İdersek de ketânveş çâk-i ceyb-i hasret itseydük
Tek ü tenhâ gice ol mâh ile tek sohbet itseydük

Cebînine o perî zülf-i müşksâ asmış
Ser-i felâket-i ‘uşşâka bir belâ asmış

Degül surîn ü miyân sun’-i çîre-dest-i hasen
O mûy-i nâzüke bir beyze-i hümâ asmış

Cebînüne tagıt ol turre-i semen-sâyı
Piyâle-nûş-i cünûn eyle ‘akl-i hod-râyı

Tekellüm eyleyüp ol şâhid-i şikeste-zebân
Kemâl-i şerm ile mahv eyledi Mesîhâyı

Çeküp fart-i hücûm-i gussa râh-i ‘ayşa sed şimdi
Leb-i hamyâze-kâra hod-be-hoddur dest-i red şimdi

Şu’ûnât-i havâdis hep mihek-pîrâ-yi vahdetdür
Ber-â-berdür yanumda imtiyâz-i nîk ü bed şimdi

Cemâlu'llâha oldı vech-i pâk-i Mustafâ mir’ât
Nümâyândur yüzinde pertev-i nûr-i tecelliyyât

Anun nûr-i cemâl-i bâ-kemâli halk olunmışdur
Zuhûra gelmedin ‘ilm-i ilâhîden bu mevcûdât