Arpaeminizade Sami Şiirleri - Şair Arpae ...

‘Âleme neşr-i füyûzât eyleyüp Rabb-i mecîd
Haclegâh-i gaybdan oldı ruh-i şâdî bedîd

Mevc mevc olup bihâr-i bî-kerân-i inbisât
İtdi pür-dür sâhil-i tab’ı kef-i şevk-i cedîd

‘Âlem garîbe nüsha-i hikmet-nümâ imiş
Her noktası netîce-i sad-müdde’â imiş

Ol mû-miyânı sîneye sarmak şeb-i visâl
Üftâde-i çeh-i zekana mûmyâ imiş

Âmâc-i nişân-i sehm-i ahbâr
Mevzûn-rev-i şâh-râh-i âsâr

Serdâr-i ketîbe-rân-i ta’bîr
Râyet-keş-i merz-bûm-i takrîr

Âsaf-i hân Ahmed-i gâzî vezîr-i bî-nazîr
Kim refâh-i kevne bâ’isdür vücûd-i nâfi’i

Hazret-i şâhenşehün dâmâd ü sadr-i a’zamı
Zıll-i Yezdânun çerâg-i pür-fürûg-i sâtı’ı

‘Âşıkam beytü'l-hazen bir cây-i me’mendür bana
Külhen-i âteş-fürûz-i ‘aşk meskendür bana

Bülbül-i âteş-nevâyam berk-i âhum âşyân
Çün semender-fıtrat âteşdân gülşendür bana

‘Atâ-sâz-i dil ol üftâdeler dâmâna düşdükçe
Yine kayd eyle cânâ defter-i ihsâna düşdükçe

İder kevser terâviş selsebîl-i ‘adnden gûyâ
‘Arak çîn-i cebîn-i dil-ber-i fettâna düşdükçe

Bâde-i bezm-i gamum reng-i ruh-i dil-hastedür
Câm-i şevküm nûn-i ma’kûs-i hat-i işkestedür

Gülsitân-i ‘âlem-i âbumda mânend-i habâb
Mevc-i mevhûm-i hevâ ser-rişte-i gül-destedür

Bâde kim revnak-fezâ-yi şîşedür her katresi
Gâze-i ruhsâre-i endîşedür her katresi

Dürd-i nâ-çîzi cerâhat-şûy-i derd ü gussadur
Merhem-i zahm-i dil-i pür-rîşedür her katresi

Bâga misâl-i cû kim akar sâgar olmasa
Yâhud kenâr-i cûda leb-i dil-ber olmasa

Lutf-i suhan nezâket-i tab’a nümûnedür
Olmaz nümâyişi ‘arazun cevher olmasa

Bahâr geldi güzellendi sû-be-sû gülzâr
Açıldı gonçe gibi ‘ukde-i dil-i efgâr

Hevâ benefşe vü gül mihr ü yâsemen meh-tâb
Felek zemîn ile reng-âşinâ-yi nakş ü nigâr