Arpaeminizade Sami Şiirleri - Şair Arpae ...

Feyz-i mihrünle dile tâb-i safâ vir yâ Rab
O nihân-hâne-i târîke ziyâ vir yâ Rab

Eyleyüp deşt-i hakîkatde dili âteş-rev
Destüme meş’ale-i nâr-i hüdâ vir yâ Rab

I
Fezâ-yi dil-güşâdur sahn-i zîbâdur ferah-zâdur
Safâlar eyle Sa’d-âbâda gel şevketlü hünkârum
‘Aceb ra’nâ ‘aceb zîbâ ‘aceb cây-i temâşâdur
Safâlar eyle Sa’d-âbâda gel şevketlü hünkârum
II

Fitne-i devr-i kamer âfet-i cândur kemerün
Tavk-i teshîr-i dil-i mâh-ruhândur kemerün

Dahme-i sîm şikem nâf ana kufl-i elmâs
Mâr-i pîçîde-ser-i genc-i nihândur kemerün

Fürûg-i lutfı füzûn itse mâh-peykerümüz
Sipihr-i bahta ziyâ-pâş olurdı ahterümüz

Siyâh-mest-i cünûn eyler ‘âşık-i zârı
Ne dem iderse perîşân-turre dil-berümüz

Geçmem ol ebrû-yi pür-çîn-i kemân-te’sîrden
Cism-i zârum geçse tîrâsâ eger zih-gîrden

Tîz-tab’ân-i zekâ pür-pîç ü tâb-i gussadur
Münfehimdür cevher-i âyîne-i şemşîrden

Geldi ol demler ki ‘âlem şâd ü handân olmada
‘Ukdeler açılmada gamlar perîşân olmada

Zulm ile vîrân olan diller olup ma’mûrezâr
Köhne-bünyân-i sitem hâk ile yeksân olmada

Geldükçe sûz-i ‘aşk o meh-pâreden bana
Âteş virür fetîle-i nezzâreden bana

Nâ-dânı hâb-i gaflete kor gerdiş-i felek
Ma’lûmdur bu cünbiş-i gehvâreden bana

Gird-i ruhında hat ki siyeh-pûş-i fitnedür
Meh-tâb-i hüsn hâle-der-âgûş-i fitnedür

Serdâr-i zülfi mülk-i dili târ ü mâr ider
Hat kim haber-resân-i bünâgûş-i fitnedür

Gönül her lahza mest-i bâde-i cân-i mahabbet mi
Misâl-i çeşm-i sâgar yohsa hayrân-i mahabbet mi

Sirişk-i hûn-feşân mı dîdeden rîzân olan her dem
Yâhud ser-mâye-i sad-mevc-i tûfân-i mahabbet mi

Gönül ki seyr-i cemâliyle kâm-yâb degül
O mihr mün’akis-i dîde-i pür-âb degül

Secencel-i dil ider nûr-i hüsni bâzîçe
Felekde şa’şa’a-i kurs-i âftâb degül