Arpaeminizade Sami Şiirleri - Şair Arpae ...

Eyleyüp gird-i zekandan hattını dil-ber terâş
Eyledi elmâsdan gûyâ ki bir sâgar terâş

Oldı her mûy-i serüm mânend-i rîş-i nahl-i Tûr
Olıcak Mûsâ-be-dest-i nâz o şûh-i ser-terâş

Eyleyüp şerh-i Buhârîde ‘ıyân
‘Aynî-i fâzıl ider böyle beyân

Olmış idi şeh-i iklîm-i Yemen
Tubba’-i sâf-dil ü pâk-beden

Ey pâdşeh-i taht-i serâ-perde-i levlâk
Cibrîl-i emîn şem’üne pervâne-i çâlâk

Ey nûr-i haremgâh-i nihân-hâne-i akdes
Sensin sadef-i bahr-i hakîkatde dür-i pâk

Ey turre-i ham-der-ham-i hem-râz-i mahabbet
V'ey çeşm-i siyeh-mest-i füsûn-sâz-i mahabbet

Sayd itmege murg-i dili hâmûn-i kazâda
Sad pâre ider pençe-i şeh-bâz-i mahabbet

Ey tûtî-i bahâr-i letâfet tekellüm it
Nutk-i Mesîh-i mu’cize-gûya tebessüm it

Yak bûriyâ seründe gönül dâg ü şerhadan
Ol mâha ‘arz-i çîn-i cebîn-i tazallum it

Ey veliyyü'n-ni’am ey âsaf-i ‘âlî-mikdâr
Ey bihîn-sufre-keş-i gürsinegân-i idbâr

Sensin ol menba’-i ser-şâr-i semâhat kim olur
Kemterîn-katre-i cûdun nice bahr-i zehhâr

Ey vücûdun sebeb-i rif’at-i şân-i devlet
Âstân-i keremün kehf-i amân-i devlet

Müftehir hidmet-i dergâhun ile câh ü celâl
Mürtefi’ nisbet-i zâtunla mekân-i devlet

Fark-i mâhiyyet-i dil çeşm-i temâşâdandur
Pertev-i nîk ü bed âyîne-i sîmâdandur

Revzen-i hâneyi sermâda güşâd itmekdür
Serdî-i bezm-i edeb hande-i bî-câdandur

Fe-hamden sümme hamden ol yegâne fâzıl ü dânâ
Yine sadr-i mu’allâya şeref-bahş-i kudûm oldı

Edîb-i nükte-dân müşkil-güşâ-yi bî-müdânî kim
Vücûd-i bî-nazîri iftihâr-i mülk-i Rum oldı

Ferâg-i tâm virüp gayrıdan bana yâ Rab
Teveccühüm sana mahsûs kıl sana yâ Rab

Hadeng-i âhumı âmâc-zîb-i te’sîr it
Kemân-i saht-i felekden virüp rehâ yâ Rab