Agah Şiirleri - Şair Agah

Nice zabt eyleyeyüm dîde-i gevher-bârı
Bûsegâh eyledi tebhâle leb-i dildârı
Zemherîr itse cihânı n’ola âh-ı serdüm
Çekmiş âgûşa büt-i kerem o gül-ruhsârı
Şimdi muhtâc-ı ‘arakdur leb-i peymâne gibi
Leb-i la‘li ki dü-‘âlemde anun bîmârı

Hattı geldükde bize râm oldı
Ne yamân yerde gün ahşâm oldı
Bâg-ı hoş meyve-i ‘âlemde bizüm
Rızkımuz hep tama‘-ı hâm oldı
Çeşm-i mestin o mehün yâd iderek
Gonçe-i dil gül-i bâdâm oldı

Sanma bîgâneveşem zâhid-i sâlûs gibi
Mahrem-i deyr-i dilem nâle-i nâkûs gibi
Gerçi sevdâ-zede-i çeşm-i bütânam ammâ
Râzdân-ı nigehem gamze-i câsûs gibi
Virmişem âh-ı girîbân-ı dili bir büte kim
Günde bin pâre ider perde-i nâmûs gibi

Meger ki cilve-i kaddün hayâlden geçdi
Ki mevc-i seyl-i sirişk i‘tidâlden geçdi
Helâk neşve-i cân-bahş-ı bâde-i la‘lün
Tebessüm itdi vü câm hilâlden geçdi
O âfetün ruh-ı hûy-gerdesi letâfetde
Hezâr mertebe sahbâ-yı âlden geçdi

Dil giriftâr olıcak zülf-i siyehfâm ne kayd
Murg-i bî-bâl u perüm keşmekeş-i dâm ne kayd
Sen ü ‘ıyş u tarab u bezm-i harîfân ey şûh
Ben ki âşüfte dimâgum heves-i kâm ne kayd
Mürşid-i ehl-i harâbât yeter pîr-i mugân
Hıdmet-i Berhemen ü secde-i esnâm ne kayd

Virür dimâg-ı dile zevk-ı ‘ayş-ı gam şimdi
O meh ne çâre bulur bâ’is-i elem şimdi
Kemend-i câzibe-i nâz u şîvedür derkâr
Ne kayd-ı kâkül ü ne zülf-i ham-be-ham şimdi
Ten oldı ferş-i rehün cân gubâr-ı cilvegehün
Tedârükün nedür ey şûh-ı pür-sitem şimdi

Yârdan ey dil yine sûz-ı nihânun var gibi
Harf-cûyâsın dehânından gümânun var gibi
Cûy-ı eşkümden ki dâmen-keşsin ey nahl-i ümîd
Âb-ı hayvânıyla besler bâgbânun var gibi
Tercemân-ı la‘l-i şîrinün zebân-ı nâzdur
Var ise bir gayri yâr-ı nüktedânun var gibi

Gehî vaslına geh hicrine şâyân itdi lutf itdi
Ne kim ben zerreye ol mihr-i rahşân itdi lutf itdi
Hele çok sardı burdı hâsılı baht-ı siyeh âhır
Beni zülf-i bütân gibi perîşân itdi lutf itdi
Çok olsun lutfı kim sahbâ-yı gamla sâkî-i devrân
Pür itdi câmumı ya‘ni ki ihsân itdi lutf itdi

Oldı bir gûne cihân lutf ü keremden hâlî
Ki çıkar câmı habâbun dil-i yemden hâlî
Meyve-i vasl-ı ümîd itdüm o mehden gâfil
Ki gelür dest-i emel bâg-ı İremden hâlî
Çeşmi bîgâne nigeh-i gamzesi agyâr-nevâz
Nice olsun dil-i mecrûh elemden hâlî

Rûzenün za‘fı hilâl-i ramazân itdi bizi
Harc-ı her rûze-i iftâr hazân itdi bizi
Berf-i pârine gibi kursi mehünde eridi
Sûz-ı dil gerçi ki bî-tâb u tüvân itdi bizi
Kehrübâ sübha-i Pervîn ele girse bâri
Tâb-ı hurşîdi sipihrün yerekân itdi bizi