Agah Şiirleri - Şair Agah

Memnûnun idüm ragbetüm olsaydı benüm de
Agyâr kadar ‘izzetüm olsaydı benüm de
Kordum felegün sînesine hâle gibi dâg
Bir şûh-ı kamer tal‘atum olsaydı benüm de
Hançer gibi bir lahza ayırmazdı yanından
Hûn-rîzlige ‘âdetüm olsaydı benüm de

Mümkün mi beste olmaya dil zülf ü hâline
Ol fitne-cûlar âdemi korlar mı hâline
Kalduk şeb-i firâk gibi tîre baht ile
İrmek müyesser olmadı subh-ı visâline
Rahm it hamîde kaddüme ey meh ki hâleveş
Çok mâh-ı evc-i hüsnün irişdük kemâline

Dime halâl ü harâm iç şarâb her ne ise
Derûnı rûşen ider âftâb her ne ise
Yâ ser-bülend yâ pâ-mâl-i nâz ider bir gün
O âfete iderüz intisâb her ne ise
Olur ya gevher-i galtân ya katre-i sîm-âb
Bir âd ider dil-i pür-ıztırâb her ne ise

Sezâ ki sürmeveş olsam siyâh-mest-i nigâh
Bu gün o merdüm-i çeşmüm libâs itdi siyâh
İdince câme-i şebgûnı ile cilve-gerî
Siyâh ider ruh-ı hurşîdi dûd-ı şu‘le-i âh
Nezâresine o şûhun çıkar girîbân-çâk
Sevâd-ı şâm-ı şeb-i kadr olursa hil‘at-ı mâh

Olmaya âdem esîr-i elem olmakdan ise
Şâd-ı merg olsa giriftâr-ı gam olmakdan ise
Ko disünler yine âzâdeligin ‘âlemi var
Beste-i turre-i pür-pîç ü ham olmakdan ise
Buhl ile ‘âleme darbü’l-mesel olmak yegdür
Mahz-ı da‘vâ ile sâhib-kerem olmakdan ise

Her sîne ki sevdâ-yı mahabbet var içinde
Tâ haşr kıyâs itme ki râhat var içinde
Encâmı olur vâsıta-i renciş-i hâtır
Her güft ü şünûdun ki zerâfet var içinde
Çâh-ı zekan-ı yâr ki zâhirde tehîdür
Bir kân-ı nemek denlü melâhat var içinde

Dilden ey şûh cefâ resmini bîrûn eyle
Tîg-ı cevr ile ya öldür beni memnûn eyle
Bâde-i la‘lüni agyâra virürsin bâri
Turma bezmünde benüm câmumı pür-hûn eyle
Gösterüp sîneni âgûş-ı girîbânundan
Beni mustagnî-i gencîne-i Kârûn eyle

Yârimüz dil-nüvâz idi bu gice
Bezm-i nâz u niyâz idi bu gice
Mübtelâ-yı firâkına dildâr
Vasl ile çâr-sâz idi bu gice
Çeşmine oldı hˇ âb-ı nâz harâm
Ol kadar ‘işve-bâz idi bu gice

Yârun dil irmedi dahı sırr-ı dehânına
Bî-çâre düşdi şübhe-i mû-yı miyânına
Dün bâga geldi zemzeme-nâk ol semen‘izâr
Gül ‘andelîbi çekdi usûliyle yanına
Gerdûnı şevk-ı kıble-nümâ gibi döndürür
Bir âfetün ki secdeberüz ebrûvânına

Sûzişüm itme füzûn hüsnüne zînet virme
Âteşüm bana yeter sende harâret virme
Ne bilür lezzet-i dîdârunı âyînesinün
Ni‘metin kadrini bilmezlere ni‘met virme
Zühdüni alana sat istemezüz lutf eyle
Zâhidâ bezmimüze gelme kudûret virme