Sipihr ‘âciz iken imtihân-ı âhumdan
O seng-dil hazer itmez sinân-ı âhumdan
O saht-bâzû-yı meydân-ı himmetem ki olur
Hamîde ebrû-yı hubân kemân-ı âhumdan
Miyân-ı ehl-i mahabbetde bî-nişân sanma
Ki ehl-i derd bilürler nişân-ı âhumdan
Dil mâ’il-i her dilber-i nâzende mi olsun
Her şûha o yektâ güher erzende mi olsun
‘Âşık heves-i vaslun ile bâga mı varsun
Bülbül gibi gülzârda hˇ ânende mi olsun
Ey çarh-ı siyeh kâse yeter minnet-i rûzî
Âzâde iken halk sana bende mi olsun
Hayâl-i ‘ârız-ı dildâr u yâr u zülf ü kâkülden
Bahâr-ı tab‘ımuz gülzârdur rengîn tahayyülden
Zamân ile gülistân idi bilmem Meşhed-i nâzun
Ki bûy-ı hûnun asla farkı yokdur nükhet-i gülden
Yine düşdüm kemend-i zülfüne endîşesüz ben kim
Peşîmân olmışam bin kere kâr-ı bî-te’emmülden
İder mi ârzû-yı vasl hicr-i yârı gören
Alur mı nâm-ı meyi agzına humârı gören
Hicâbdan eriyüp şebnem olmasun n’olsun
Bu âb u tâb-ı gazabla o gül‘izârı gören
Şikest-i tevbeden âsân bilür şikest-i dili
Gönül virür mi o şûha bu inkisârı gören
Firkat demidür ey dil-i nâlân ne turursın
Kârun mı degül nâle vü efgân ne turursın
Ol âfete benzer yine bir şûha mı bakdun
Ey dîde-i ter vâlih ü hayrân ne turursın
Bilmem ‘aceb ol gamze-i hûn-rîzi mi gördün
Yanumda gönül böyle hirâsân ne turursın
Sezâ ki ide leb-i cân-fezâsı rûh ile bahs
Ne rûh çeşme-i hayvân u ‘ömr-i Nûh ile bahs
Kim idi sâkî-i bezmün ne câm-ı mesti idük
Ki zehr-i handün ider bâde-i sabûh ile bahs
O bâdenün ki benem rind-i ‘âfiyet-sûzı
Leb-i habâbı ider tevbe-i nasûh ile bahs
Deryûze ider subh-ı tebessüm dehenümden
Gül-gonçe-i hurşîd açılur yâsemenümden
Ol şem‘-i serâ-perde-i kudsem ki mükerrer
Efrûhtedür şu‘le-i Tûr encümenümden
Ol gülbün-i nevreste-i hüsnüm ki hayâdan
Pûşîde geçer dîde-i gülçîn çemenümden
Mest olduguna ‘âlemi mestâne sanursın
Görsen leb-i bâmı leb-i peymâne sanursın
Nîk ü bed-i nergis gibi bir gözle bakarsın
Her bed-güherî gevher-i yekdâne sanursın
Bir vasl içün âteşlere düşmiş degülüz biz
Ey gonçe-dehen bülbüli pervâne sanursın
Ey gamzesine ruhsat-ı cevr ü cefâ viren
Virmez mi sana sûz-ı mahabbet bana viren
Ey dil telâş-ı ni‘met-i dîdâr tâ-be-key
Sen sâbir ol ki rızk virür iştihâ viren
Hûn-ı cigerle eyleme tahsîl-i reng ü bû
Ey tıfl-ı hû hınâ da virür dest ü pâ viren
Ser-mest-i tegâfül-i nigeh-i yâra ne dirsin
Vâkıf mı degül hâl-i dil-i zâra ne dirsin
Müjgânları âlûde-i hûn-ı dil ü her-dem
Çeşm-i siyehi itdügi inkâra ne dirsin
İnsâf mıdur tâ-be-key izhâr-ı tecâhül
Meftûnunam ey şûh sitemkâra ne dirsin
Bu şaire henüz hiç kimse yorum yapmadı. İlk yorum yapan sen ol!