Agah Şiirleri - Şair Agah

Gamun ne neşvesi vardur ayıl ayıl ne bu gam
O gül-ruhun yüzine bak mayil mayil ne bu gam
İcâzet olmaz ise dest-bûsına yârun
Hınâ gibi ayagına yakıl yakıl ne bu gam
Huzûr ‘âkıbet-endîşlükde az bulunur
O âfet istemez ister takıl takıl ne bu gam

Nâ-tüvân itdi beni yâr ne ister bilmem
Eyleyüp sâz-ı gama târ ne ister bilmem
Çeşm-i dâgumda degül penbe sefîd olmuşdur
Bakmayup lutf ile dildâr ne ister bilmem
Ne gubâr-ı reh-i cânân ne ider sürme beni
Hâk idüp baht-ı siyehkâr ne ister bilmem

Ey hâl-i ruhun mâye-i sevdâ-yı mahabbet
Gülzâr-ı ‘izârun çemen-ârâ-yı mahabbet
Sen her ne kadar hüsn ile mümtâz-ı cihânsın
Ben ol kadar âşüfte vü rüsvâ-yı mahabbet
Hûn-âbe-i eşküm mi yâ hûd cûşiş-i dilden
Çıkdı yüze teh cur‘a-i mînâ-yı mahabbet

Rehîn-i ye’s olayum ger huzûr istersem
Gam ile haşr olayum ger sürûr istersem
Murâdı üzre sipihr eylesün beni pâ-mâl
Virüp fütâdegî elden gurûr istersem
Çü şem‘-i sûz-ı mahabbet bana harâm olsun
Miyân-ı bezm-i tarabda zuhûr istersem

Gâretger-i dîn yârdan Allah’a sıgındum
Ol şûh-ı tama‘kârdan Allah’a sıgındum
Görür gözedür âyîneveş gönlümi ol mâh
Çeşm-i bed-i agyârdan Allah’a sıgındum
Kâlâ-yı dil ü câna meger ragbet ider mi
Bu seyr-i harîdârdan Allah’a sıgındum

Dâg-ı dilümi mihr-i dırahşâna degişmem
Çeşm-i terümi çeşme-i hayvâna degişmem
Ya‘kûb-ı hazîn Yûsufı da üste virürse
Gamhânemi ben külbe-i ahzâna degişmem
Rindân ile hem-bezm olalı meykedelerde
Hum gûşesini taht-ı Süleymâna degişmem

Dil-i pür-sûz ile bî-sabr u karâr-ı ‘aşkam
Hânmân sûhte-i tâb-ı şerâr-ı ‘aşkam
Eşk-i gülgûn u ruh-ı zerd güvâhumdur kim
Perveriş yâfte-i bâg u bahâr-ı ‘aşkam
Halka-i ka‘be bana vahşet-i dâm-âver iken
Şimdi bî-zahmet-i sayyâd-ı şikâr-ı ‘aşkam

Seher ki dildeki sûz-ı nihân fâş itdüm
Bir âh ile nefes-i subhı şu‘le-pâş itdüm
Bu kârhânede bî-kayd-ı atlas u dîbâ
Hemân müşâhede-i hüsn-i hoş-kumâş itdüm
Ezel ki kısmet-i erbâb-ı ‘işret eylediler
Nevâle-i gam u laht-ı dile telâş itdüm

Gezmese duhter-i rez herze humârın aramam
Gül der-âgûş-ı nesîm olmasa hârın aramam
Kevkeb-i tâli‘ eger olsa çerâg-efrûzum
‘Âlemün mihr ü meh ü leyl ü nehârın aramam
İl çerâg ile arar birbirinün nîk ü bedîn
Dinlerem zemzeme-i zâg u hezârın aramam

Sipihr-i hüsnde bir âftâb-ı meh-cebîn buldum
Felek ragmına ben de bir civân-ı nâzenîn buldum
Olup zünnâr-bend-i imtihân deyr-i mahabbetde
Hezârân küfr ü dîn her gûşede ‘uzlet-nişîn buldum
O dergâhun ki ben hâk-i reh oldum âstânında
Leb-i sad-dîde-i ümmîdvârı bûse-çîn buldum