Agah Şiirleri - Şair Agah

Dil-i mecrûhuma sevdâ-yı zülf-i pür-şiken düşmez
Ser-â-pâ tâze tâze zahmdur müşg-i Huten düşmez
Hayâl-i hâm ile dil âh vâh itmekde bilmez kim
O nahl-ı nâzdan tahrîk ile sîb-i zekan düşmez
Kumâş-ı hüsn-i Yûsuf nukre-i çeşm-i sefîd ister
Muhassal râygân Ya‘kûba bûy-ı pîrehen düşmez

Meyânı vasfını yârun ki gâh gâh iderüz
Nezâket ile şak-ı hâmeden nigâh iderüz
Cefâya eylese âgâz o şûh-ı çâr ebrû
Figân u nâle makâmını çârgâh iderüz
Mezâkın anlamaduk hîç vasl u hicrânın
Görünce âh iderüz görmeyince âh iderüz

Bir nefes şâd olmadı tıfl-ı dil-i nâ-şâdımuz
Beslenilmiş cûy-ı şîr ile meger Ferhâdımuz
Gelmede her dem hayâl-i mâh-rûyân fevc fevc
Oldı dil âyînesi bir şehr-i hüsn âbâdımuz
Hâme-i Mânî siyâh olsa ‘aceb mi reşkden
Nakşda sûretger-i takdîrdür üstâdımuz

Ey şeh-i hurşîd-mesned dâver-i ‘âlî-cenâb
Kemterîn mahv-ı cemâlün çeşm-i mâh u âftâb
Çeşm-i terde mihr-i ruhsârun olurdı cây-gîr
Mazhar-ı berk-i tecellî olsa fânûs-ı habâb
Magfiret-hˇ âhân-ı dergâh-ı Hudâya ey şefî‘
Olmaya na‘tun gibi hergiz du‘â-yı müstecâb

Yârsuz câm-ı mey-i dîde-i pür-nem bilürüz
Nagme-i ceng ü ney zemzeme-i gam bilürüz
‘Aşkda tâ o kadar bî-ser ü sâmânuz kim
Hâl-i âşüftemüzi kâkül ü perçem bilürüz
Hele da‘vâ-yı tecerrüd de ta‘allukdandur
Terk-i tecrîd ideni ‘Îsî-yı Meryem bilürüz

Çok oldı nâziş-i agyâr-ı yârı öksemişüz
Uzandı fasl-ı zemistân bahârı öksemişüz
Misâl-i şebnem-i nergis-nişîn gözümde uçar
O denlü câm-ı mey-i hoş-güvârı öksemişüz
Şikâyet itmedeyüz şûh-ı nev-güzeşte gibi
Ki hattı yok bu belün ‘ayş-ı yârı öksemişüz

Âşüfteligüm zülf-i perîşânı begenmez
Ser-geşteligüm girdiş-i devrânı begenmez
Olsa leb-i hˇ âhiş ne kadar bûseye müştâk
Her günc-i leb ü gûşe-i dâmânı begenmez
Hîç yeryüzinün zîbi tevâzu‘ gibi olmaz
Bu kâmet-i ham ebrû-yı hûbânı begenmez

Olmaz bahâr-ı hatt ile hâtır gubârsuz
Bu faslda hevâlar olur i‘tibârsuz
Tenhâ-firîb-i hurde-i hicrânı ben miyüm
Vaslına irmez âyîne de intizârsuz
Devrinde mihr olursa da ‘uryândur ehl-i dil
Tut kim kumâşun oldı felek pûd u târsuz

Dil-i dîvânemüz Mecnûn-ı şeydâyı salındurmaz
O rind-i lâubâli degme rüsvâyı salındurmaz
Giriftâr-ı teb-i germ-i mahabbet öyle bîmâram
Ki nabzum ıztırâbı mevc-i deryâyı salındurmaz
Rakîb-i divden kat‘ itmege dildârı şemşîrüz
Bizi yanınca hayf ol şûh-ı hercâyı salındurmaz

Ne hicrden gilemendüz ne vasla hû iderüz
Ne ise maksadun ey yâr-ı kîne-cû iderüz
Dil-i figârı idüp şâd-ı yâd-ı zülfün ile
O zahmı rişte-i ümmîd ile rüfû iderüz
Yanında ruhsat-ı nezzâra küfr ile birdür
O hod pesend ile bî-hûde güft[u]gû iderüz