Ahi Şiirleri - Şair Ahi

Sayd olupdur murğ-ı dil bir gözleri şehbâz ile
Altun üsküfli kara gözli güzel şehbâz ile

Hemdemüm geh sûz u ‘ışk gâh sâz u nâledür
Hurrem ol dem kim geçer ‘âlemde sûz u sâz ile

Éy nesîm-i kudretüñ nefhinde âdem bir nefes
V’éy harîm-i gülşen-i lutfuñda ‘âlem hvâr u has

Zikr-i hamdüñdür ki her milletden oldı âşikâr
Ka‘be’den âvâz-ı hû büt-hâneden bâng-i ceres

Rûz-ı mahşerde a‘yân olmağa ol hâl baña
Bir levend-nâme yeter nâme-i a‘mâl baña

Dil-i tecrîd ki baş koşdı ben âvâre ile
Bir levendüm ki refîk oldı bir abdâl baña

Bir elif çekdi yine sîneme cânân bu géce
San sarıldı baña bir serv-i hırâmân bu géce

Ayuñ on dördi gibi dün géce meclisde édüñ
Kanda ahşamlayasın éy meh-i tâbân bu géce

N’ola kûyuñda itüñ lutf ile bir kerrelige
Dése yapuşup etegüme bizüm gölgelige

Ger güzer eyler ise sîneme tîr-i ğam-ı dôst
Sîne lutfından anuñ muhkem utanup elike

Baş koşdı nergis ü gül cem‘ oldı bir araya
Bir éki oñmaduklar birkaç yeñi yakaya

Ol lebler içün içmedük peymânesini yâruñ
Bir tolıyı kim içmez şol éki merhabâya

Kim kemân-ebrûlaruñ beñzetdi kurbân ayına
Âferîn olsun anuñ kurbân olayın râyına

Cânumı kurbân édüp pay étdiler meh-pâreler
Ol ala gözlüm benüm gelmez mi kurbân payına

Andan berü kim basduñ ayağuñ yüzüm üzre
Nakş oldı na‘alçeñ yéri éki gözüm üzre

Tâ haşra degin sebz-i mahabbet vére hâküm
Saçın çözüp ağlarsa bulutlar tozum üzre

Evvel cihânda la‘net aña kim güzel seve
Koca sakallu cilf kekez mübtezel seve

Lâyık mıdur ki sen sevesin el kuça müdâm
Dil-ber odur ki sen kuçasın dâyim el seve

Néçün öykündüñ déyü la‘l-i lebi cânâneye
Sâkîyi gör kim ne kanlar yutdurur peymâneye

Şem‘-i serkeş kellesi kızdukça bezm-i yârda
Germ olup her dem yalıñ hançer çeker pervâneye