Gel Allah'a Dön Allah'a

Kerem eyle Seyyid Seyfî
Gel Allâha dön Allâha
Kendüne eyleme hayfı
Gel Allâha dön Allâha

Ceddün çün Muhammed Âlî
Nic’oldı bunların yolı
Nefse uyup olma deli
Gel Allâha dön Allâha

Bülbüller gibi ötersün
Halka mürşidlik satarsun
Sen hod añlardan betersün
Gel Allâha dön Allâha

Seyyidüm der ögünirsün
Bu hâlüne sevünirsün
Sakın bir gün dögünirsün
Gel Allâha dön Allâha

Ceddün eger dirse sana
Ne getirdün benden yana
Armağanun var mı ana
Gel Allâha dön Allâha

Aña varacak yüz gerek
Cevâp virecek söz gerek
Dîdâr görecek göz gerek
Gel Allâha dön Allâha

Seyyid Nizâmoğlu hele
Amelsüz seyyide n’ola
Şimdengirü yola gele
Gel Allâha dön Allâha

Seyyid Seyfî budur sözüm
Seyyidlere toprak yüzüm
Kerem eyle iki gözüm
Gel Allâha dön Allâha