Geldim Bu Yere Şiiri - Seyyid Seyfi Niza ...

Ben ezelden dost yüzüni
Gördüm de geldüm bu yire
Âdemle cennet zevkini
Sürdüm de geldüm bu yire

Münâfıklar gelmez yola
Kâfirlere mihnet gele
Nûh kavmini cümle sele
Virdüm de geldüm bu yire

Kalmazum cân ile başa
Dostdan dönmek yokdur hâşâ
İbrâhim ile âteşe
Girdüm de geldüm bu yire

Mûsâ ile çıkdım Tûra
Gözlerüm Hak yüzin göre
Tecellâ olınan nûra
İrdüm de geldüm bu yire

Âşık oldur vire serin
Göre yârin Hak dîdârın
Tâlûtla Câlût askerin
Kırdum da geldüm bu yire

Meşhûr olmışdur ellerde
Söylenen cümle dillerde
Süleymân tahtın yellerde
Kurdum da geldüm bu yire

Eyyûb ile düşdüm derde
Nice yıllar âh u zârde
Hep gövdemün etin kurda
Virdüm de geldüm bu yire

Zekeriyyâ ile ağaca
Girdüm gizlendüm ey hâce
Destere ile biçünce
Turdum da geldüm bu yire

Kimsenün bakma yüzine
Nazar eyle hak sözine
Îsâ ile gökyüzine
Vardum da geldüm bu yire

Yâkûbla başladum zâre
Gözümde ak oldı kare
Yüregümi yüz bin pâre
Yardum da geldüm bu yire

Âhir budur benim sözüm
Muhammed'dür iki gözüm
Ayağı tozına yüzüm
Sürdüm de geldüm bu yire

Tanrı Arslanı Velîyle
Bir kez yitişdüm eliyle
Hayber kal'asın Ali'yle
İrdüm de geldüm bu yire

Seyyid Seyfullâh adını
Komışdur koyan bu dîni
Yerün gögün bünyâdını
Urdum da geldüm bu yire