Dediler Bir Gün Ashab Rasul'e

Didiler bir gün ashâbı Resûl'e
Şefâat madeni aslü’l-usûle

Neye benzer bu âlem yâ Muhammed
Haber vir bize ey lûtf ıssı Ahmed

Bu dünyânun misâli didi server
İki kapusı var bir hana beñzer

Tenezzül eyleyüp ervâh yerinden
Birinden girüp çıkarlar birinden

İkinci benzer ağaç gölgesine
Kanarlar tok ile ac gölgesine

İderler anda bir lâhza karârı
Giderler kalur ağaç gölge varı

Üçünci benzer âdem bir hayâle
Döner bir anda yüz bin dürlü hâle

Didiler yine ey rûh-ı musavver
Bu âdem ömri dahı neye beñzer

Didi bu ömr-i âdem yele benzer
Ve hem bir taşkın akar seyle benzer

Üçünci kara benzer gün içinde
Eriyüp kalmaya bir ân içinde

Didiler böyle dünyâda bu ömre
Nedür ya âhiret emrüñe çâre

Didi ol iki âlem şâhı Ahmed
Zemîn ü âsumânun mâhı Ahmed

Şehâdet savm ile hacc u zekâtı
Dahı emr olunan beş vakt salâtı

Elünden geldügince eylemekdür
Sakın dime ki bu zâid emekdür

İkinci zâhirün bâtına tebdîl
Eger itdünse oldun ehl-i tekmîl

Üçünci Hakdan ayrı mâsivâyı
Gönülden sür gider cümle hevâyı

Olur mir’ât-i dil anda mücellâ
Görinür anda envâr-ı tecellâ

Bilindi çünki Seyyid Seyfî her hâl
Yüri bir mürşid-i kāmilden el al

Saña telkîn ide tevhîd-i darbı
İdesün leşker-i nefsünle harbi