Aşık Çelebi Şiirleri - Şair Aşık Çelebi

Niçe demdür ölümlük dirilür bir derd-nâkem ben
Beni kor öldürürsin gayriyi ana helâkem ben

Gubârum irgüren dâmânuna ‘ışkun hevâsıdur
Benüm yolında toprak oldıgum yoksa ne hâkem ben

Noktası sır fenn-i ‘ışkun bir kitâbı var imiş
Surh-ı hûn-ı ‘âşık ile fasl u bâbı var imiş

Hîçe sayılur ser-i ‘uşşâk anda sıfr-veş
Defter-i ‘ışkun da başka bir hisâbı var imiş

Olaldan bezm-i cânda sâkî-i hicrân kadeh gerdân
Mey-i gül-gûn ile pür-câma döndi çeşm-i hûn-efşân

Ecel peymânesin pür itmeden ol sâki-i devrân
Demîdür cür’a-i vaslundan ire ‘ömr-i câvîdân

Ölmekden özge çâre mi var derd-i yârdan
Âsân ne ola ‘âşıka terk-i diyârdan

Ben âdemem hevân ile cûş eylesem n’ola
Deryâ temevvüc eyler imiş rûzgârdan

Olup her zahm agız her fetîl anda zebân yir yir
Derûnum çâkin eyler ‘âleme şerh ü beyân yir yir

Bu âh-ı âteş-efşânum benüm bir kilk-i zerrîndür
Yazar ta’vîz-i sâk-ı ‘arş içün nûr-ı duhân yir yir

Onulmaz yârelerle sîne mihnet lâle-zârıdur
Açılmış gülşen-i ‘ışkun yine evvel bahârıdur

Bedende zahm-ı tîg-i hecr-i dilber şâhlardur kim
Yanında her taraf peykân u hançer berg ü bârıdur

Pertev-i mihr ü muhabbet ki dile lâmi’ olur
Gün gibi mihrüm o meh-rûya benüm şâyi’ olur

Derd çekdükce gönül ‘ışka dahı tâmi’ olur
Bana rahm itmege kasd eylese bir mâni’ olur

Rakîb ol âfitâba karşu kendüye mekân itmiş
Gören dir mihr-i rahşân ile Mirrîh ıktırân itmiş

Yazarken hâşiye âyât-ı hüsnünden hat-ı müşgîn
Komışsun noktasın hâlünden agzunda kemân itmiş

Rindân getürür ayagı sıngun çeri gibi
Bekler surâhi yöreni meydân eri gibi

Kanda kızındı su gibi her dem döküp saçar
‘Uşşâk hûnî tîginün alnı deri gibi

Ruhında gerçi kim zülfi niçe diller helâk eyler
Düşenler âteş-i sûzâna dûdından ne bâk eyler

Ferîd iken melâhat ‘arsasında hâl-i yekdânun
Senünle kim ola ‘âlemde bahs-i iştirâk eyler