Aşık Çelebi Şiirleri - Şair Aşık Çelebi

Haymen etrâfın dil artık devr ider câsûsdan
Taşra kalmış sanki bir pervânedür fânûsdan

Haste-i ‘ışkı uşandursa hayâl-i hâl-i dost
‘Aks-i zülf olur meges-rân şehper-i tâvûsdan

Her gören bir dem ferah yellerle gam-nâk oldugum
Gussa vü şâdî gamından bildi bî-bâk oldugum

Hey öninde öldügüm yolında kurbân oldugum
Dâmen-efşân olma kapunda görüp hâk oldugum

Her şeb ruhun gibi bize bir vech ile togar
Bu şîveyi kamer de güneşden alur satar

Resm-i cefâ vü cevri niçe mahv ide sirişk
Sengîn-dilünde olmış o ke’n-nakşı fi’l-hacer

Her tolusı bedr olur her cur’asıdur bir hilâl
Bezmine cânlar virür ol âfitâbun ehl-i hâl

Ger günâh ise mahabbet dostum kanum sebîl
Cürm ise vaslun temennâsı begüm katlüm helâl

Her zerrenün çü behresi var âfitâbdan
Arzun nasîbi cür’a-i câm-ı şarâbdan

Bâd oldı zinde nefh-i dem-i nev-bahârla
Hâk itdi hande reşha-i feyz-i sehâbdan

Hevâ-yı vasl-ı pehlûsı nesîm-i zülf-i reyhânı
Birisi hazz-ı cismânî gıdâdur biri rûhânî

Sürinür sâye-veş yanınca üftâde olup cânum
Yürise serv-i âzâdum hırâmânî hırâmânî

Heves-i sohbet-i cânân ile öldüm gitdüm
İrmedüm vuslata hicrân ile öldüm gitdüm

Nâlişüm işide rahm eyleye öldüre diyü
Âh kim nâle vü efgân ile öldüm gitdüm

Heykel-i rûh-ı musavver oldı gûyâ ol dehân
Hatt-ı reyhân ile yâkût ana yazmış hırz-ı cân

Altûn igneyle çıkarmak kasd idüp dilber gözüm
Eylemiş peykân-ı tîr-i cân-sitânın zer-nişân

İlâhî dâg-ı ‘ışkun isterüm dilde çerâg olsun
Bu kül öksüzi anunla uyansun od ocâg olsun

Ölicek zeyn idün nergisle gülle kabrüm etrâfın
O servün reh-güzârından yana tâ göz kulag olsun

İlâhî isterüm gözde gönülde eşk ü âh olsun
Hemîşe münkir-i ‘ışka iki sâdık güvâh olsun

Hevâ-dârum benüm âhumdur ancak gitmesün benden
Elifle âh ile cismüm ser-â-ser âh âh olsun