Agah Şiirleri - Şair Agah

Şu denlü virdi safâ câme-i sefîd sana
Ki ‘arz-ı tîregî eyler sabâh-ı ‘îd sana
Ko nîm-i bismil-i nâz u girişme kalsun dil
K’olur mukâbele-i ecr-i sad şehîd sana
İderdi tâ‘at-ı sad-sâlesin rehîn-i mecâz
Bu hüsn ile nazar itseydi Bâyezîd sana

O şûha niyâzı begendürmişüz
Niyâz ile nâzı begendürmişüz
Tezerv-i murâdı şikâr itmede
Niçe şâhbâzı begendürmişüz
Tahammülde cevr ü cefâya gönül
Gam-ı cân-güdâzı begendürmişüz

Müdâm tîredür ol dil ki şem‘-i dâg olmaz
Bu bezme böyle ziyâ-bahş bir çerâg olmaz
Çü şebnem ol güli nezzâre altına alma
Edebde hoş tutalum göz içün yasâg olmaz
Ne şâd olur bulan ü ne elem çeker yitüren
Bizüz o güm-şüde kim kâbil-i sürâg olmaz

Ne zâhid ü mütedeyyin ne pîr-i bâde-fürûşuz
Şehân-ı kişver-i hüsne gulâm-ı halka be-gûşuz
Düşer mi da‘vi-yı zîb-i libâs-ı zühd-i vera‘ kim
Hezâr dâg ile âlûde rind-i hırka be-dûşuz
Sipihr-i gûş-ı be-âvâz-ı nâlemüz meh ü hûrdan
Velî ne nagme-i Mansûr ne sadâ-yı sürûşuz

Gönülde ol ruh-ı pür-âb u tâb saklanmaz
Derûn-ı âyînede âftâb saklanmaz
Ruh-ı latîfine olmaz nikâb perde-i şerm
Nühüfte-gevher-i yektâda âb saklanmaz
O şûha çîn-i cebîn tercümân-ı hâl yeter
Derûn-ı dilde olan ıztırâb saklanmaz

Bahâr geçdi gelür bülbülün nevâsı henûz
Dükendi bâde vü dilde kadeh du‘âsı henûz
Ten öldi hâk ü mezârumda lâle açıldı
Başumda gûşe-i meyhânenün havâsı henûz
Giderse şâm-ı gam u lâlenün de dâg-ı dili
Cihâna sürme virür bahtımun karâsı henûz

‘İşret-i gûşe-i meyhâneyi herkes bilmez
Mest çok vâdi-i mestâneyi herkes bilmez
Başına dönmegi cânâ bana mahsûs eyle
Şem‘ine gerdiş-i pervâneyi herkes bilmez
Gussa-i zevk-nümâsına gelür mestlerün
Zehr-i hand-leb-i peymâneyi herkes bilmez

Rütbe-i ehl-i dili çeşm-i neminden bilürüz
Sadef-i pür-güheri cûş-ı yeminden bilürüz
Şûriş-i Berhemen ü zemzeme-i nâkûsı
Cezbe-i kâmil-i hüsni saneminden bilürüz
Çeşm-i şûhun bize hışm ile nigâh eylemesün
Âhû-yı vahşî-i endâzı reminden bilürüz

Zevk-i endûh ile dilşâd ki dirler o bizüz
Gâh vîrân u geh âbâd ki dirler o bizüz
Günde bin kerre bizi öldürür ihyâ eyler
Küşte-i besmele mu‘tâd ki dirler o bizüz
İrem-i kûyına pervâz iderüz himmet ile
Bî-per ü bâl perîzâd ki dirler o bizüz

Âgûşa çekdi rûyını çeşm-i pür-âbımuz
Bahr-ı muhîta oldı nihân âftâbımuz
Şebnem gibi sitâre-şümâruz şeb-i firâk
Gülberg-i cennet olsa eger câme-hˇ âbımuz
Havfum budur ki minnet-i hışt-ı hum olmasa
Sakf-ı sipihri kaldıra cûş-ı şarâbımuz