Hayretteyim Hayretteyim

Ten kimün ki ben bilemem
Hayretdeyüm hayretdeyüm
Ben baña hîç men diyemem
Hayretdeyüm hayretdeyüm

Gözümdeki kimdür gören
Gönlümdeki kimdür duran
Kimdür nefes alup viren
Hayretdeyüm hayretdeyüm

Dilümde kimdür söyleyen
Kulakda kimdür diñleyen
Kimdür bu idrâk eyleyen
Hayretdeyüm hayretdeyüm

Bu adımın kimdür atan
Ağzumdaki lezzet niden
Bu çigneyüp kimdür yutan
Hayretdeyüm hayretdeyüm

Elümdeki kimdür tutan
Tutduğunı geri atan
Kimdür alan kimdür satan
Hayretdeyüm hayretdeyüm

Tenümdeki cânum neden
Gözümdeki kanum neden
Bu dînüm îmânum neden
Hayretdeyüm hayretdeyüm

Seyyid Nizâmoğlu hemân
Her iş hakkun tutma gümân
Ya pes nedür yahşi yaman
Hayretdeyüm hayretdeyüm