Temûz İrişdi Cihân Gark-i Tef Ü Tâb Oldı

Temûz irişdi cihân gark-i tef ü tâb oldı
Zemîn harâret ile vakf-i pîç ü tâb oldı

İdüp kemâl ile germiyyet-i hevâ te’sîr
Çekîde-i ‘arak-i gül-ruhân gül-âb oldı

Düşince pertev-i hurşîd ka’r-i deryâya
Derûn-i yemde olan mâhiyân kebâb oldı

O denlü şiddet-i tâb-i temûz kim zerrât
Cihânda her biri bir kurs-i âftâb oldı

Bu demde katre-i bârân degül harâretden
O denlü pûte-i gerdûn pür-iltihâb oldı

Siyeh gamâmı güdâzendegî-i hurşîdî
Misâl-i külçe-i fûlâd eritdi âb oldı

Bu fart-i harr-i hevâ iştidâd-i germâdan
Tuyûra bâ’is-i hem-rengî-i gurâb oldı

‘Arak-feşândur o da sanma rûy-i deryâda
Hurûş-i mevce ile câ-be-câ habâb oldı

O dem ki zîbiş-i tahrîr-i vasfı temmûzun
Murâd-i mâşıta-i tab’-i müstetâb oldı

İdüp külâle-i dûşîze-i hayâle eser
Çü reng-i surh-i ‘alev hod-be-hod hızâb oldı

İdüp güdâhte sîmîne-kurs-i mâhı temûz
Degül hilâl-i felek halka-sâz-i bâb oldı

Ne bâb dâ’ire-i halka-i felek-sâyı
Muhît-i merkez-i mülk-i Ferâsiyâb oldı

Ne bâb zerre-i nâ-çîz-i hâk-i şeh-râhı
Yegâne-gevher-i ser-tâc-i âftâb oldı

Dahı ‘alâmet-i nâ-şüste-rûyı bâkîdür
Kamer o bâbda ruh-sûde-i türâb oldı

Ne bâb pâdşehân-i cihân-gîrâna
Melâz-i müstened ü cây-i intisâb oldı

O bârgâhda keyvân-i heftümîn ile mâh
Gulâm-i halka-be-gûş-i felek-cenâb oldı

Mülûk-i ‘âlemün ilçileri yüzin sürerek
Gelüp o bâb-i sa’âdetde kâm-yâb oldı

Bu bâbda sözüm isbâta kâdirem dir isem
Ki pâdşehlere de merci’ ü me’âb oldı

Ne bâbdur ki anun südde-i mu’allâsı
Memerr-i esb-i şehenşâh-i meh-rikâb oldı

Sipihr-kevkebe şâh-i Sikender-isti’dâd
Ki re’yi âyine-i çihre-i savâb oldı

O ber-güzîde-i ‘Osmâniyân kim ikbâli
Kadem-nihende-i ecrâm-i nüh-kıbâb oldı

Fezâ-yi evcde haytü'ş-şu’â’-i hurşîdî
Hıyâm-i devletine zer-feşân tınâb oldı

Muhît kûze-i cûdında katre-i nâ-çîz
Nüh âsmân yem-i lutfında bir habâb oldı

Eritdi beyze-i mâhı hilâl idince felek
Miyân-i savletine tîg-i şu’le-tâb oldı

Olup vezîde nesîm-i bahâr-i insâfı
Cünûd-i fitne ser-ender-lihâf-i hâb oldı

Figân ider gam-i ‘âlemle yok zamânında
Meger ki nâle-i bî-hûde-i zübâb oldı

Harem-serây-i şükûhında kemterîn güncişk
Kemâl-i zûr ile nâhun-zen-i ‘ukâb oldı

Olınca sâha-i kuhsâra münteşir ‘adli
Gazâle pençe-i şîrân serîr-i hâb oldı

Dem-i bahârda bârân degül hoy-efşândur
Ki dest-i cûdı hacâlet-res-i sehâb oldı

O şeh-süvâr-i saf-ârâ-yi kâm-rânî kim
Kümeyt-i haşmetine mâh-i nev rikâb oldı

Zihî semend-i süreyyâ-kutâs-i çâbük-pây
Ki hem-çü sâ’ika ol dem ki pür-şitâb oldı

Kemîn-şerâre-i na’li hilâl resmidür
Su’ûd idüp felege şu’le-i şihâb oldı

O hing-i bâsıra-cevlân ki peyk-i endîşe
Dem-i müsâbaka pes-mânde-i hicâb oldı

Hudâygâne-i (?) dehrâ şeh-i felek-kadrâ
Ma’ârif ehline lutfun ki bî-hisâb oldı

Kasîdeme nazar it ‘âtıfetlü hünkârum
Bu ‘arz-i hâle fakat şefkatün cevâb oldı

Felek didükleri nâ-ber-karârdan feryâd
Ki dil elinde sitem-horde-i ‘ikâb oldı

Bu tengnâ-yi felâketde kalb-i nâ-şâda
Hemîşe kârı anun renciş-i ‘azâb oldı

Derûnı âteş-i mihnetle eyleyüp pür-dâg
Tenûr-i sînede laht-i ciger kebâb oldı

Felâhen-i sitemi sengsâr-i zucret idüp
Misâl-i hâtır-i ‘âşık gönül harâb oldı

Sipihr-i kînever ü bed-meniş hayâlinde
Eziyyet ehl-i dile mûcib-i sevâb oldı

Gürûh-i nâdire-sencân-i nükte-fehmâna
‘Adâveti hele bî-şekk ü irtiyâb oldı

Meded-res ol meded ey pâdşâh-i zî-şânum
Ki lutf ü merhametün dehre bî-hisâb oldı

Penâhgâh ideli dergeh-i mu’allânı
Sipihre ‘arz-i niyâz itmek irtikâb oldı

Fütâdegâna olan dest-gîr sensin sen
Ki yüz süren der-i vâlâna kâm-yâb oldı

Nigâh-i merhamet et Sâmî-i garîbüne de
Ki dergehünde o da bende-i türâb oldı

‘İnâyet ü kereme mazhar eyle kim diyeler
Telâfî-i sitem-i çerh-i nâ-savâb oldı

Ümîd-i mertebe-i hâcegî-i dîvânî
Derûna mâye-i teşvîş ü ıztırâb oldı

Be-hakk-i nûr-i nebî nâ’il-i merâm eyle
Der-i sa’âdetüne geldi pür-şitâb oldı

Bilindi maksad-i mâ-fi'z-zamîr hâmûş ol
Suhan resîde-i ser-makta’-i nisâb oldı

Söz âhir oldı hulûs ile bir du’â it kim
Sürûş-i gayb diye müjde müstecâb oldı

Hemîşe sûziş-i tâb-i temûz ile tâ kim
Zemîn pür-âteş ü ‘âlem pür-iztırâb oldı

Sipihri zâtuna Hak sâyebân-i râhat ide
Ki şekl-i felke-i zerrîni âftâb oldı

Ola vücûdı murabba’-nişîn-i kasr-i hayât
Binâ-yi ‘ömr-i ‘adû tâ ki pür-harâb oldı