Baki Şiirleri - Şair Baki

Ne hoş yaraşdı sipihre kevâkib içre hilâl
Takında pâyine gûyâ ki cevherî halhâl

Tulû’ idince ufukdan miyân-ı encümde
Takıldı gerden-i gerdûna sanki ‘ıkd-ı le’âl

Nev-bahâr irişdi vü gitdi şitâ
Keyfe yuhyi’1-arza ba’de mevtihâ

Leblerüñde hattuñ ey şîrîn-dehen
Mûrlar cüllâba düşmiş gûyiyâ

Nihâl-i kâmetüñ hakkâ ‘aceb nahl-i dil-ârâdur
Egerçi kaddüñ a’lâ kâkülüñ a’lâdan a’lâdur

Çerâg-ı hüsnüñüñ nûrı fürûg-ı şem’-i kâfûrî
Nigâr-ı ‘anberîn-gîsû nihâl-i sîm-sîmâdur

Nişâne sûz-ı dile âhumuñ şirâresidür
Belî belâyı iden ‘âşıka sitâresidür

Şihâb sanma felekde giceyle zâhir olan
Mahabbet ehlinüñ ol tîg-i âhı yarasıdur

Nîzesi cânuma vü nîzesine cân ditrer
Yâr kim togru ola üstine yârân ditrer

Şöyle sarsar felegi sadme-i bâd-ı âhum
‘Âleme lerze düşer günbed-i Keyvân ditrer

Olsa zülfi o gül-’izâra nikâb
Olur âşüfte sünbül-i sîr-âb

Dûd-ı âhum ruhuñ hevâsıyla
Ebr olur yagdurur cihâna gül-âb

Olsun gamuñda bencileyin zâr u bî-karâr
Âfâkı gezsün aglayurak ebr-i nev-bahâr

Tutsun cihânı nâle-i mürgân subh-dem
Güller yolınsun âh u figân eylesün hezâr

Piyâle husrev-i mülk-i gama tâc-ı Keyânîdür
Hum-ı mey pâdişâh-ı ‘aşka genc-i husrevânîdür

Dahı Cemşîdi yâd eyler gözinden kan döker meclis
Mey-i gülgûn sirişki câm çeşm-i hûn-feşânıdur

Pür olup devr idicek meclis-i mestânı kadeh
Çarh olur halka-i rindân meh-i tâbânı kadeh

Felek-i ‘işrete bir ahter-i ferhunde iken
Yine Mirrîh-sıfat turma döker kanı kadeh

Riyâz-ı hüsnde olmış o la’l-i nâb lezîz
Cihân içinde bilürsin olur şarâb lezîz

Dem-i visâlde hoşdur yüzüñ görüp ölmek
Bahâr günleri olur seherde hvâb lezîz