Yine Bir Feth-i ‘Âlî Âşkâr Oldı Mübârek-bâd

Yine bir feth-i ‘âlî âşkâr oldı mübârek-bâd
Zuhûr-i mu’cizât-i mefhar-i ‘âlem Muhammedle

Te’âla'llâh ‘aceb nusret ‘aceb feth-i cezîl oldı
Kemâl-i himmet-i hân Ahmed ibni hân Muhammedle

Alındı hısn-i vâlâ-yi Revân ya’nî revâfızdan
Hücûm-i leşker-i şâhenşeh-i Cemşîd-mesnedle

Füzûn eyle İlâhî ‘ömrini ikbâlini dâ’im
Ki ‘âlem emn ü râhat buldı ol şâh-i mü’eyyedle

Hemîşe eyle dîn ü devleti ma’mûr ü âbâdân
O sultân-i hümâyûn-baht o şâhenşâh-i emcedle

Nüvîd-i fethin ol hısn-i mu’allânun işitdükde
Hayâl eyler iken târîh-i pâkin şevk-i bî-hadle

Cenâb-i çâr-yârün feyzi ile iki mısra’da
Muvaffak oldı tab’um çâr-târîh-i ser-âmedle

İki târîh olup her mısra’-i pâkîzesi evvel
Kalem izhâr-i san’at eyledi bu beyt-i es’adle

Mukaddem mısra’un sânîsi ile noktasuz harfi
Sekiz târîh oldı sarf-i fikr-i tab’-i erşedle

Dü mısrâ’un hurûf-i cevherîsin cem’ idüp hâme
Yine târîh-i zîbâ oldı feyz-i vakt-i es’adle

Bu beyt-i dil-güşâdur kim ider Sâmî kulı ithâf
Ebü'l-feth-i zamân ol pâdşâh-i sâhib-i ‘adle

Revân-i pâk-i eshâb oldı memnûn cümleten ey dil
Revân alındı a’lâ-himmet-i sultân Ahmedle

Sene 1137