Tîre-tab’ı Zişt-hû Tercîh İder Bî-kîneden

Tîre-tab’ı zişt-hû tercîh ider bî-kîneden
Seng-i hârâ hûb olur zengîye sâf âyîneden

Çün tehî-dest-i niyâz olmaz güher-çîn-i vusûl
Nakş-i mârun farkı ne ârâyiş-i gencîneden

Şekl-i mihr ü mâhı dehrün mahv olur gitmez henûz
Nakş-i hüsnün dîdeden dâg-i hayâlün sîneden

Müsmir-i incâz iden âhir olur gül-çîn-i kâm
Mezra’-i ümmîdi tohm-i va’de-i pîşîneden

Seyr ider bir gûşeden ser-der-girîbân-i ferâg
Atlas-i gerdûnı ceyb-i hırka-i peşmîneden

Bârî bir gün heftede ünsiyyeti ta’lîmdür
Kasd-i şâri’ ragbet-i cem’iyyet-i âzîneden

Dûş-i tab’a nev-be-nev tahmîl-i bâr-i ta’n ider
Pâ-birûn olmak tarîk-i ‘âdet-i dîrîneden

Kayd-i vahşetden berîdür Sâmiyâ zûd-âşinâ
Murg-i dest-âmûz olur âzâde dâm-i çîneden