Tîr-i gam-ı nigâr ile ten yara yaradur
Şemşîr-i cevr-i yâr ile dil pâre pâredür
Öykünse haddüñe ne gam ey âfıtâb-ı hüsn
Mâh-ı sipihr kemdür o ne yüzi karadur
Hâlüñ hayâli hâtır-ı agyârı kıldı cây
Gûyâ karañu gicede rûşen sitâredür
Eş’ârum içre vasf-ı leb-i yâr gûyiyâ
Âb-ı zülâl içinde yatur la’l-pâredür
Çeşm-i hakâret ile nazar kılma dûstum
‘Uşşâk-ı haste-hâli de Allâh yaradur
Bâkî derûnum âteşinüñ dûdıdur felek
Mihr-i sipihr âhum odından şirâredür
Kayıt Tarihi : 12.4.2016 11:33:00





© Bu şiirin her türlü telif hakkı şairin kendisine ve / veya temsilcilerine aittir.

Bu şiire henüz hiç kimse yorum yapmadı. İlk yorum yapan sen ol!