Özümü itirmişem Şiiri - Sevinc Arzulu

Həsrət şərbətin içib,
Ayrılıq məni seçib.
Burdan milyonlar keçib,
İzimi itirmişəm.

Çəkdiklərim mənə bəs,
Yaşayırammı əbəs.
Daha duymayır heç kəs,
Sözümü itirmişəm.

Gedirsənsə mən qalım,
Kədər ilə tən qalım.
Alışmayır tonqalım,
Közümü itirmişəm.

Qəm suyla axmayır ki,
Şimşək tək çaxmayır ki.
Yoluna baxmayır ki,
Gözümü itirmişəm.

İllər keçir çox yeyin,
Qalmayıb ki baş-beyin.
Tapsanız mənə deyin,
Özümü itirmişəm.