Nem qarışıb Şiiri - Sevinc Arzulu

Nədən belə şair könlüm,
Sevincinə qəm qarışıb.
Şəkər tökdün, deyil şirin,
Çayın deyən kəm qarışıb.

Qara geyib bu olacaq,
Sinən altı buz olacaq.
Yanmayacaq bu od-ocaq,
Qurusuna nəm qarışıb.

Düşmüsən möhnət quyuna,
Kim su içə,kim yuyuna.
Bir bax Kür-Araz suyuna,
Sanki suya dəm qarışıb.

Həsrət şirin məqam deyil,
Qışda dolu yağan deyil.
Bu, sevdiyim muğam deyil,
Zilinə pəs, bəm qarışıb.

Göy buludun tökdüyü nə,
Qəmin daş-daş sökdüyü nə.
Sənin daim çəkdiyinə,
Daha acı təm qarışıb.