Müjdeler Âfâka Kim Lutf-i Hudâ-yi Lâ-yenâm

Müjdeler âfâka kim lutf-i Hudâ-yi lâ-yenâm
Virdi ser-tâ-ser cihâna inbisât-i şevk-i tâm

Rûşenâyî-bahş olup zulmet-nişînân-i gama
‘Arz-i mihr itmekde her gün çerh ber-vefk-i merâm

Kalmayup âyîne-i dilde küdûretden eser
İn’ikâs-i rûy-i handânı bedîd oldı tamâm

Âşkâr oldı verâ-yi perde-i eflâkden
Dûr-bînân-i hayâle çihre-i ümmîd-i kâm

Dîdeler rûşen siyeh-bahtâna kim subh-i ferah
İtdi ‘âlemde şeb-i endûhdan ref’-i zalâm

Her kesün mir’ât-i kalbi oldı sûret-yâb-i feyz
Kim görindi peyker-i mâ-fi'z-zamîr-i hâs ü ‘âm

Cây-i dîger kalmadı güncâyiş-i şahs-i gama
Saf çekince dilde şâdî dûş-ber-dûş-i zihâm

Şimdi mîzân üzredür hep gerdiş-i sencîdesi
‘Aksine devr itmedendöndi sipihr-i kec-hırâm

Ehl-i dil çokdan arardı girdi dâmânı ele
İtmek âsândur felekden şimdi ahz-i intikâm

Hak budur kim bu kemâl-i inşirâhun vakti hîç
Çeşm-i encümle felek seyr itmemişdür ve's-selâm

‘İlm-i hakdur şâhid-i ‘âdil ki günden âşkâr
Safha-i hestîde nakş-i kur’a-i ferhunde-nâm

Her nefes sad minnet Allâhu ‘azîmü'ş-şâna kim
Lutf ü ihsân eyledi ber-tıbk-i dil-hâh-i enâm

Ya’nî bir zât-i kerîmü't-tab’-i ‘âlî-himmeti
İtdi sadr-i a’zam-i şâhenşeh-i vâlâ-makâm

Öyle bir şâhenşeh-i zî-şân ki kemter çâkeri
Dergehinde gıbta-bahş-i İbni ‘Abbâd ü Nizâm

Âstânı bâliş-i âsâyiş-i şâhân-i dehr
Hâk-i pâyı cevher-i iksîr-i ikbâl-i enâm

Evliyâ-haslet semiyy-i Ahmed-i Muhtâr kim
Zâtıdur fevc-i gürûh-i devlet ü dîne imâm

Pâdşâh-i bî-bedel şâhenşeh-i dîn ü düvel
Zıll-i Hak ‘azze ve cel şâh-i Ferîdûn-ihtişâm

‘Akl ü rüşdi hayret-efzâ-yi ‘ukûl-i kâ’inât
‘Adl ü insâfı cihâna bâ’is-i emn ü nizâm

Hazret-i sultân Ahmed hân-i sâlis kim sezâ
Emrine şâhân-i heft-iklîm eger olursa râm

İftihâr-i hânmân-i devlet-i ‘Osmâniyân
Mu’tenâ-yi dûdmân-zâdân-i İskender-gulâm

Hep görilmişdür tevârîh-i havâkîn-i selef
Gelmemişdür böyle ‘âkil-pâdşâh-i nîk-nâm

Hak te’âlâ düşmen-i bed-hâhını makhûr idüp
İde evreng-i şehenşâhîde zâtın ber-devâm

Her kesün mâhiyyet-i fıtrîsini fehm eyleyüp
Ana eyler hâl-i istihkâkı üzre ihtirâm

Bu yeter burhân-i vâzıh lem’a-i idrâkine
Kim çerâgı ola böyle sadr-i memdûh-i kirâm

Habbezâ sadr-i felek-câh-i mu’allâ-pâye kim
Çak hazîz-i dergehinde çerh ider darb-i hıyâm

Sadr-i ‘âlî-şân vezîr-i husrev-i Dârâ-nişân
Dest-gîr-i müstmendân melce’-i hâs ü ‘avâm

Ol vezîr-i bî-bedel kim olmış idi tâ ezel
Şîme-i müstahseni makbûl-i sultân-i enâm

Hidmetin şâyeste-i tab’-i hümâyûn eyleyüp
Eyledükçe sâdıkâne bezl-i vus’ ü ihtimâm

Devlet ü dîne vücûdın cümle-i a’yândan
İntihâb itmişdi kim ola medâr-i intizâm

Dahı şekl-i evvel-i kârından istintâc idüp
Haml iderdi fart-i isti’dâdına mâ-lâ-kelâm

Hep terâhî muktezâ-yi hâl idi bu vakte kim
‘İllet-i ga’iyyeye olmışdı ol merd-i hümâm

Mübtenâ-yi her umûr evkâtine merhûn imiş
Dehre takdîr-i İlâhîdür viren rabt-i nizâm

Gösterince yüz ‘arûs-i hacle-i hükm-i ezel
Şâh-i ‘âlem kıldı dâmâd eyleyüp kâ’im-makâm

Oldı meşhûd-i nigâh-i i’tibâr ü dikkati
Kim taharrî üzre ‘adl itmekde âfâka müdâm

Bildi kim tab’ındaki bi'l-kuvve âsâr-i kemâl
Fi’le geldi mesned-i sadr-i hükûmetde tamâm

Hubb-i aslîye ‘ilâve oldı meyl-i incizâb
Nev-be-nev itdi tekâzâ ragbet-i bî-infisâm

Gayrılardan sâbık-i mızmâr-i rüchân oldugın
Gördi ol eblak-süvâr-i şevket-i zînet-licâm

Mühr-i ikbâli virüp itdi vekîl-i saltanat
Kıldı istiklâl ile hem ana teslîm-i zimâm

Âsaf-i bî-misl İbrâhîm paşa kim anun
Kıble-i âmâldür dergâhı çün beytü'l-harâm

Hil’at-i şân-i vezâret dûş-i isti’dâdına
Togrısı her vech ile çespân ü lâyıkdur tamâm

Râstdur ser-menzil-i tevfîke râh-i himmeti
Kim ider habl-i metîn-i şer’e dâ’im i’tisâm

‘Âdeti celb-i kulûb-i bî-kesân-i rûzgâr
Dil-şikest-i ye’se lutfı mûmyâ-bahş-i merâm

‘Aynıdur dirdüm kef-i zer-bahş-i gevher-bârınun
Ger sevâd-i gamdan olsa şüste ruhsâr-i gamâm

Pâye-i evvelde eyler âstânın bûs iden
Süllem-i gerdûndan a’lâ irtikâ-yi kasr-i kâm

Bâl-i ‘ankâveş açıldukça seher mısra’ları
Halka-i bâbı olur evvel hümâya tavk-i dâm

Zîr-i na’l-i sümm-i esbinde şerâr-i rîze-seng
Kurs-i hurşîdi ider çün şu’le sıkt-i in’izâm

Bûy-i müşk-i Rumî hulkı ile kuvvet bulsa ger
Bâgzâr-i Şâmdan kesb-i şemîm eyler meşâm

Öyle sârîdür cihâna ‘adl ü dâdı kim olur
Sâye-i zîr-i cenâh-i bâzda mahmî hamâm

Hâtem-i Tâyî rikâb-i kurra-i cûdında pest
Bermekî dergâh-i ihsânında bir kemter gulâm

Oldı bî-şek sadrı teşrîf eyleyince şâd-kâm
‘Âlem-i ma’nâda ervâh-i selâtîn-i ‘izâm

Hûyı nerm ü tab’ı nâzük hulkı ahsen vaz’ı hûb
Hâsılı evsâf-i mahmûdeyle meşhûr-i enâm

Haşre dek bî-fâsıla olsa kalem cârî yine
Mümteni’ tekmîl-i ıtrâsında îfâ-yi kelâm

Eyle Sâmî ba’d ez-în çün hatt-i la’l-i mehveşân
Safha-i ihlâsı da’vât ile miskiyyü'l-hitâm

Âsmân döndükçe sadr-i kâm-rânîde ola
‘Ömr ü devlet ber-mezîd ü ‘izz ü şâdî ber-devâm

Hazret-i hallâk-i bî-hemtâ vücûd-i pâkini
Hıfz ide âfâtdan sıhhatle tâ rûz-i kıyâm

Sadrı teşrîf itdügi günden ki târîh oldı zabt
Umaruz anı ide sâhib-mi’e Rabbü'l-enâm

Mühr-i ikbâli alınca tab’a ilhâm itdi Hak
Bi'l-bedâhe iki mısra’ her biri târîh-i tâm

Âsaf-i devr oldı İbrâhîm paşa yümn ile
Buldı İbrâhîm paşa ile mühr ikbâl ü nâm

Sene 1130