Güzîn-i Pâdşehân-i Memâlik-i Âfâk

Güzîn-i pâdşehân-i memâlik-i âfâk
Yegâne-gevher-i ser-tâc-i âl-i ‘Osmânî

Riyâz-i saltanatun gül-nihâl-i ikbâli
Sipihr-i ma’deletün âftâb-i rahşânı

Vücûdı zıll-i hudâvend-i âsmân ü zemîn
Cemâli pertev-i hurşîd-i sun’-i Rabbânî

O bihterîn-i havâkîn-i mülk-i ‘âlem kim
Müsellem oldı ana şevket-i cihânbânî

Hudâygân-i serîr-i kalem-rev-i şâhî
Nekâve-i halef-i dûdmân-i Orhanî

Şükûh-bahş-i ekâlîm-i seb’a kim tutdı
Cihânı debdebe-i heft-cûş-i ‘unvânı

Cenâb-i hazret-i sultân Ahmed-i gâzî
K'odur halîfe-i şer’-i habîb-i Yezdânî

Diyânet-i ‘Ömer İbnü'l-’Azîz ile mevsûf
Ebû ‘Alîyi ider mahv-i gıbta iz’ânı

Kitâb ü sünnete kavli tevâfuk üzre tamâm
Hısâl ü şîmesi ber-nehc-i hükm-i Kur’ânî

‘Ulûm-i dîn ü ehâlî-i ‘ilme ragbet idüp
Hemîşe ‘âdeti kesb-i rızâ-yi rahmânî

Yapup hulûs ile bu dâr-i ‘ilm-i zîbâyı
Cihâna eyledi neşr-i safâ-yi rûhânî

Kitâb-hâne binâ itdi hasbeten li'llâh
İdüp kemâl ile ta’zîm-i şer’-i sübhânî

Hoşâ binâ’-i musanna’ ki tarz-i matbû’ın
Olur görince Sinimmâr-i akl hayrânı

Zihî rivâk-i mu’allâ-tıbâk-i bî-hemtâ
Ki resm-i dil-keşidür tarh-i tab’-i sultânî

Cidârı rif’at ile âsmâna hem-serdür
Metânet üzre esâsı rasîn bünyânı

Sezâ bu beyt-i kemâlün dü-mısra’-i bâbı
Mu’aşşer eylese nüh-beyt-i çerh-i gerdânı

Hazînedür hücerâtı fünûn-i şettâya
Misâl-i kenz-i dil-i ‘âlimân-i hakkânî

Ser-i melâ’ike-i âsmâna efser olur
O kubbeler kim irişmiş sipihre hîtânı

Çü hâne-i dil-i nûrânî-i veliyyu’llâh
Fürûg-i şems-i ‘ulûm itdi mahz-i nûrânî

Bu gûne bir eser-i dil-pezîre hazret-i Hak
Muvaffak eyledi ol pâdşâh-i zî-şânı

Serây-i pâk-i hümâyûnda eyledi inşâ
Bu câygâh-i ‘ulûm-i sa’âdet-erkânı

Be-hürmet-i suhuf-i enbiyâ vü çâr kitâb
Be-hakk-i ‘ilm-i şerîf ü be-vahy-i sübhânî

Be-nûr-i zât-i cenâb-i Muhammed-i ‘Arabî
Be-’ilm-i fıkh ü hadîs ü be-sırr-i furkânî

Serîr-i devlet ü ikbâlde mü’ebbed idüp
Mu’ammer eyle İlâhî o şâh-i devrânı

Binâ-yi devleti ma’mûr olup safâlar ile
Halelden ola masûn intizâm-i dîvânı

Kemâl-i sıhhat ile şâh-zâdegânı ile
Ola makâm-i hilâfetde pîr-i nûrânî

Tamâm olınca kitâb-hâne Sâmî-i bende
Ser-i tefekkürine çekdi çün girîbânı

Du’â tarîki ile râst düşdi târîhi
Mübârek ola bu dârü'l-kitâb-i sultânî

Sene 1131