Gül düzdünmü heç Şiiri - Sevinc Arzulu

Xatirələrə bükülüb,
Yandır sən Simurq tükünü.
Ayrılığın qəm yükünü,
Əlac tapıb çözdünmü heç.

Tez dur, boylan sübh danına,
Günəşin doğum anına.
Vüsalının hicranına,
Həsrətinə dözdünmü heç.

Arxamızda ömr dayanıb,
Gah qara, gah ağ boyanıb.
Bir gecə qəfil oyanıb,
Otaqları gəzdinmi heç.

Hara saldın güzarını,
Bilmədin ki azarını.
Görəndə dost məzarını,
Ürəyini üzdünmü heç.

Ayrılıqdan dad eyləyib,
Gedənləri yad eləyib,
Ruhunuca şad eləyib,
Üstünə gül düzdünmü heç.