Dâver-i ‘Âlem Şeh-i Sünnî Emîrü'l-mü’minîn

Dâver-i ‘âlem şeh-i sünnî emîrü'l-mü’minîn
Pâdşâh-i şark ü garb İskender-i gerdûn-cenâb

Pîşvâ-yi ehl-i sünnet mefhar-i dîn ü düvel
Kâmil-i pâk-i’tikâd ü husrev-i devlet-me’âb

Ber-güzîn-i dûdmân-i devlet-i ‘Osmâniyân
Dürr-i ser-tâc-i selâtîn-i ‘izâm-i kâm-yâb

Hazret-i sultân Ahmed bin Muhammed hân kim
Bendegân-i dergehidür Behmen ü Efrâsiyâb

‘Akl ü isti’dâd ü takvâ vü salâh ile ‘alem
Himmet ü şevketle memdûh-i gürûh-i şeyh ü şâb

Bû Bekir-sıdk ü ‘Ömer-insâf ü zü'n-nûreyn-hilm
Şîr-i Hak-savlet hudâvend-i velâyet-intisâb

Ol şehenşâh-i hümâyûn-baht-i kişver-gîr kim
Tab’ıdur rûh-i latîf-i Murtazâdan feyz-yâb

Mihr-i ‘adli saltanat burcından işrâk ideli
Hüsn-i tedbîrinde yokdur zerre kâr-i nâ-savâb

Bir su’âle yer komaz gerden-keşân-i ‘âleme
Nass-i kâtı’veş zebân-i tîgidür hâzır-cevâb

Esse çöllerde nesîm-i ‘adli germ-ülfet olup
Âhuvân eyler ser-i şîr-i neri bâlîn-i hâb

Öyle virdi ittihâd ezdâda mümkindür k’ola
Halka-i gird-âb-i yem tennûr-i pür-sûz-i kebâb

Saltanat da’vâsını iden mülûk-i nev-zuhûr
Nice kâbildür k'ola ol şeh-süvâra hem-rikâb

Sadr-i vâlâ-yi hilâfetde asîl ü kâm-rân
Hazret-i Fârûka oldı ‘adl ile nâ’ib-menâb

Rütbede Tahmâsb ile mîr Mahmûd ibni Veys
Birisi har-bendesidür birisi derbân-i bâb

Bâ’is-i âsâyiş-i ‘âlem zamân-i devleti
Sulh ile buldı ‘imâret bu kühen-dâr-i harâb

Şu’le saldı ser-be-ser âfâka nâr-i heybeti
Mû-der-âteş gibi a’dâ oldı vakf-i pîç ü tâb

Şimdi ez-cümle melâ’în-i revâfız def’ine
Her tarafdan kıldı irsâl-i cünûd-i bî-hisâb

Şî’a kim ‘âdetleridür bugz-i eshâb-i kirâm
Siyyemâ sıddîka vü şeyhayna ta’n-i nâ-savâb

Hâşeli'llâh kim ola anlarda hubb-i ehl-i beyt
Hâksâr-i kahr ola yâ Rab be-hakk-i Bû Türâb

Çâr-yârün hürmetine kıl Hudâyâ anları
Cûş-i deryâ-yi hezîmetle garîk-i ıztırâb

Bu durur ümmîdümüz Îrânı yek-ser feth idüp
Ne Revân kalur ne Tebrîz ü Herât olur harâb

Râfızîden ahz ider hep mülket-i mevrûsesin
Rûz ü şeb budur du’âmuz eyle yâ Rab müstecâb

Zulmet-i ilhâd ü rafzı mahv ü nâ-bûd eyleyüp
Nûr-bahş ola fürûg-i râyeti çün âftâb

Mesned-i devletde tûl-i ‘ömr ile te’yîd ide
Devr ide ber-vefk-i dil-hâhı sipihr-i nüh-kıbâb

Nahcuvân teshîrini ihsân iden hayy-i nasîr
Lutf ide sâ’ir kılâ’ına karîben feth-i bâb

Sâmiyâ tebşîr birle fethi târîhin didüm
Nahcuvânı aldı sultân Ahmed-i ‘âlî-cenâb

Sene 1135