Agyâr ile sen müdâm şâd u hurrem
Ben reşkle dâg dâg ser-tâ-be-kadem
Ey şûh vefâ resmüni gamdan ögren
Ben terk-i gam itdüm beni terk itmez gam
..
Niçe bir eyliyeyüm serv-i hırâmânuna hayf
Niçe bir eyliyeyüm vaz‘-ı perîşânuna hayf
Dâm-ı her murg-ı heves turre-i perçînüne âh
Kadr-ı nâz anlamıyan nergis-i fettânuna hayf
Çekdügüm mihnet-i hicrâna hezârân efsûs
Bî-vefâ eyledügün ‘ahd ile peymânuna hayf
Oldı bâzîçe-i dest-i sitem her has u hâr
Ey gülistân-ı hayâ pâkî-i dâmânuna hayf
Dâg-ber-dâg dil-i haste-i Âgâh dirîg
Degmedi minnet-i bihbûdî-i dermânuna hayf
..
O dil ki dâg-ı mahabbet şerâre-efgen olur
Felek-sitâre vü hurşîd ü meh nişîmen olur
O şem‘ hem-dem-i agyâr olunca dâg oluram
Ki şu‘le bende vü gayrun çerâg-ı rûşen olur
Kimi ki fark-ı ser itsem müdâm cilvegehin
Döner sipihr-i cefâkâra ol da düşmen olur
Olursa nîm-nigâh ile de tesellî-i bahş
Gehî hicâb u gehî hˇ âb u nâz-ı reh-zen olur
Dem-â-dem âteş-i cân-sûz-ı şevkden Âgâh
Turur turur dil-i dîvâne germ-şîven olur
..
Âgâh bizüz ki bûddan nâ-bûduz
Ser-tâ-be-kadem bir âh-ı dûd-âlûduz
Bî-dâg-ı mahabbet eylerüz mahv-ı vücûd
Çün sâye ziyâ-yı mihrden mevcûduz
..
