Bilecem,vallah Şiiri - Sevinc Arzulu

Azalmır dünyanın hiylə-kələyi,
Yenə də səmadan dərd-qəm ələyir.
Qapımı döyəndə ölüm mələyi,
Əcəlin özünə güləcəm, vallah.

Dönəcəm vüsalın tək pənahına,
Batacam dünyanın eşq günahına.
Üz tutub görünməz səcdəgahına,
Dərdimi Tanrıyla böləcəm, vallah.

Məhəbbət yad deyil adi şaha da,
Aşiqlər baş əyməz padişaha da.
Azalmır ağrısı, artır daha da,
Öləndə başımdan öləcəm, vallah.

Vüsalın evini həsrət yıxmayır?!
Üz-üzə gələndə əlin sıxmayır.
Demə ki, sevgidən başım çıxmayır,
O qəmli gözünü siləcəm, vallah.

Eşqini qəlbimdə uyutmayacam,
Ağ vüsal quşunu uçurtmayacam.
Mən səni heç zaman unutmayacam,
Qədrini əbədi biləcəm, vallah.