Benim delim Şiiri - Dr İlhame Müslümova

Mənim dəlim, kinli olma bu qədər,
Küləksənmi kükrəyəsən, əsəsən?
Sevgi elə ucuz deyil gedəsən,
Salam belə asan deyil kəsəsən…

Bəyənmirəm bu get gəlli halları,
Sevmirəm də belə qeylüqalları …
Qorxudursa səni eşqin yolları,
Başa salım, gəl, o yolu kəsə sən …

Əzab vermə daha mənə , özünə,
Uzaq durma, qurban olum gözünə,
Məhəl qoyma qürurunun sözünə,
Qulaq ver o könlündəki səsə sən …

Qara bəxtim varlığınla ağlanıb,
Sevinclərim gözlərində saxlanıb,
Göbək bağın taleyimə bağlanıb,
Gedəcəksən başqa hansı kəsə sən?)

Mənim dəlim , bir az düşün dərindən,
Qaydaları sən oynatma yerindən…
Bilmirsənsə ,gəl, soruşaq birindən….
“Ömür elə uzun deyil küsəsən” …