‘Ârızuñ âb-ı nâbdur gûyâ
Zekanuñ bir habâbdur gûyâ
Dilde envâr-ı mihr-i ruhsâruñ
Âbda mâh-tâbdur gûyâ
Nakş-ı hüsn-i hatuñla safha-i dil
Bir musavver kitâbdur gûyâ
Bezm-i gamda dü çeşm-i pür-hûnum
İki şîşe şarâbdur gûyâ
Tutdı mihri cihânı ol mâhuñ
Pertev-i âfitâbdur gûyâ
Bâkıyâ hâl-i ‘anberîni anuñ
Nâfe-i müşg-i nâbdur gûyâ
Kayıt Tarihi : 12.4.2016 14:54:00
Şiiri Değerlendir
© Bu şiirin her türlü telif hakkı şairin kendisine ve / veya temsilcilerine aittir.
Bu şiire henüz hiç kimse yorum yapmadı. İlk yorum yapan sen ol!