Zahm-ı Sînem Ol Gözi Şiiri - Baki

Zahm-ı sînem ol gözi mekkâre gâyet hoş gelür
Yara açarsam revâdur yâre gâyet hoş gelür

Tûtiyânuñ minnetin kehhâl kahrın çekmeden
Hâk-pâyuñ dîde-i hûnbâra gâyet hoş gelür

Eylese cevr ü cefâ mihr ü vefâdur gâyeti
Hak budur kim ‘âşık-ı gam-hvâra gâyet hoş gelür

Bir ‘aceb dârü’ş-şifâdur kûyı derd ehline kim
Anda hep nâ-hoş varan bî-çâre gâyet hoş gelür

Câna râhatdur ser-i kûyuñda âh itdükleri
Ol hevâlar Bâkî-i bimâra gâyet hoş gelür