Yüz Tutup Dergâha Şiiri - Askeri Gülaboğlu

Yüz tutup dergâha bu ben siyeh-rû
Umaram fazlunı dâ’imâ Yâ hû
İçirdün sahbâ-yı zâtundan tolu
Çok şükür Yâ Rabbi el-hamdüli’llâh

İdindüm yolunda aşkunı hem-râh
Visâlün haccına gösterivir râh
Ledünnî ilmine eyledün agâh
Çok şükür Yâ Rabbi el-hamdüli’llâh

Kalmadı menzil-i merâtib asla
Bir oldı ‘aynıma zîr ile bâlâ
Cânuma cân oldı matlab-ı a’lâ
Çok şükür Yâ Rabbi el-hamdüli’llâh

Cemâlün eyledi canda tecellî
Şu mahzun yüreğim buldı teselli
Eyledün bendene in’âmı küllî
Çok şükür Yâ Rabbi el-hamdüli’llâh

Askerî kulundur senün efendi
Takıldı boynuma zülfün kemendi
Sayd itdi gönlümüz aşkımın fendi
Çok şükür Yâ Rabbi el-hamdüli’llâh