Yaşıdım qızlar Şiiri - Sevinc Arzulu

Bir azca qocalmışıq,
Fələkdən bac almışıq.
Nənə tək ucalmışıq,
Onlarsız könül sızlar.
Mənim yaşıdım qızlar.

Bəzədilər dünyamı,
Fizulisi, Xəyyamı.
Daha keçdi əyyamı,
Hanı o işvə-nazlar.
Mənim yaşıdım qızlar.

Ilahidən payımsız,
Günəşimsiz, ayımsız.
Mənim isti yayımsız,
Sizsiz ürəyim buzlar.
Mənim yaşıdım qızlar.

Göydən yerə enməz ki,
Tanrı nuru sönməz ki,
Bir də geri dönməz ki,
O baharlar, o yazlar.
Mənim yaşıdım qızlar.