Yaradıcılıq İntiharı Şiiri - Habil Yaşar 2

Kitablarını qaranlıqda yazıb,
işığa qənaət edənlər,
heç zaman bilməyəcəklər
xoşbəxtliyin nə olduğunu.

Göydən üç alma da düşməyəcək,
nə də heç olmasa biri.
Əksinə dəlmə-deşik tavanlarından,
yağışlar yağacaq içəri.
Otaqda
bir şam əriyəcək
yazarın ürəyi kimi.
pərvanələr uçacaq,
bədbin duyğular kimi.
Əzilmiş vərəqlərin,
köhnə hekayələrindəki qəhrəmanlar,
dünyaya çıxa bilmədikləri üçün
şikayətlənəcək.
yeni bir qəhrəman yaradıb,
onu da
bizim kimi,
zirzəmidə həbs etməyə haqqın yoxdu deyə bağıracaqlar.
Üsyan bürüyəcək otağı...
mürəkkəb yerinə qan axacaq,
vərəqlərin arasından.
qələmi sındırılacaq yazıçının
olan-qalan ümidləri kimi.
Bu mənzərədən,
ilhamın da qaralacaq qanı,
yazıçını tərk edib
yetim buraxacaq arzularını.
Və beləcə
intiharı başlayacaq yaradıcılığın.

Qapılarını döyməyəcək şansın,
mərhəmətinə sığınanlar,
sonunda anlayacaqlar
aldandıqlarını.