Verme mene Şiiri - Sevinc Arzulu

Uzunluğun ölçə bilməm,
Hündürlüyün seçə bilməm,
Daxilindən keçə bilməm,
Qara divar hörmə mənə.
Tanrım, dərd-qəm vermə mənə.

Azalt od-köz yağışını,
Qurutma söz yağışını.
Axıtdığım göz yaşını,
Daha rəva görmə mənə.
Tanrım, dərd-qəm vermə mənə.

Gəldin hardan-hara bayquş,
Döndün lala-kara bayquş.
Gözü qanlı qara bayquş,
Qanadını gərmə mənə.
Tanrım, dərd-qəm vermə mənə.

Könül evi qum, gil olar,
Qəlb sakini nisgil olar.
Gözlərimə bir mil olar,
Çəkmə qara sürmə mənə.
Tanrım, dərd-qəm vermə mənə.

Tale yaman, qədər iti,
Çay axmayır hədər iti.
Bağlı qalmış kədər iti,
Uzaqdan bəd hürmə mənə.
Tanrım, dərd-qəm vermə mənə.