Tunar Şiiri - Sevinc Arzulu

Tumarlayım telini,
Uzat mənə əlini.
Nazu-nemətlər görüb,
Allahım, xoş gün verib
Razı salsın elini.

Şirin-şəkər, balmısan,
Xoş xəyala dalmısan.
Sən yatmırsan, bizi də
Yorğun-arğın salmısan.

Gül balam, gülşən balam,
Beşikdir guşən, balam.
Arzum budur olasan,
Daim gülər,şən balam.

Sarı, sarışın Tunar,
Kiçik qarışın, Tunar.
Qızlar səndən küsübdür,
Tezcə barışın, Tunar.

Xəmiri mayalı ol,
Ayağı sayalı ol.
Atan kimi mərd insan,
Anan tək həyalı ol.

Xoşbəxt tək doğul, balam,
Qənd balam, noğul balam.
Dünya səninki olsun,
Ay mənim oğul balam.