Te’âla'llâh Zihî Âsâr-i Feyz-i Müste’ânî ...

Te’âla'llâh zihî âsâr-i feyz-i müste’ânî kim
Zuhûrından cihâna nev-be-nev zevk ü safâ geldi

Açıldı gül gibi dil-beste-i endûh iken ‘âlem
Gülistân-i meserretden nesîm-i cân-fezâ geldi

Karîrü'l-’ayn-i behcet eyledi çerh-i kühen-sâli
Bu şevk-i tâzeden çeşm-i cihâna rûşenâ geldi

Ne behcetdür bu kim sulb-i cenâb-i hân Ahmedden
Vücûda böyle bir şeh-zâde-i sa’d-âşinâ geldi

Sa’âdetle olup teşrîf-sâz-i ‘âlem-i tekvîn
Serîr-i mesned-i i’zâza hoş geldi safâ geldi

Çehâr-esdâf-i ‘unsûrdan bedîdâr oldugı hengâm
Kenâr-i bahr-i ikbâle dür-i ‘âlem-bahâ geldi

Gelince lâne-i mehde o şeh-bâz-i yed-i kudret
Rü’ûs-i bendegân-i devlete zıll-i hümâ geldi

O pâkîze güher çün zîb-i dîhim-i vücûd oldı
Merâyâ-yi kulûba pertev-i nûr-i Hudâ geldi

Hulûsıyla mukaddem mushaf-i dilden tefe’ülde
Zuhûr-i nusret ü fethe peyâm-i dil-güşâ geldi

Velûdından pey-ender-pey iki şeh-zâde-i pâkün
Dü şâhid sıdk-i fâl-i hayra şimdi bî-merâ geldi

Suhanda ihtisâr âb-i güherdür şîr ü şekkerdür
Ko ıtnâbı zamân-i temme bi'l-hayr-i du’â geldi

Cenâb-i pâdşâh-i ‘âleme şeh-zâdegânıyla
Du’âya başla kim saf saf sürûşân-i ‘alâ geldi

İlâhî bahtın ‘âlî ‘ömrin efzûn eyle kim dehre
Şu’â’-i âftâb-i yümn-i zâtından ziyâ geldi

Masûn it dîde-i hussâddan âyîne-i tab’ın
Ki nûr-i pertevinden çeşm-i câna incilâ geldi

Vücûdın hıfz idüp şeh-zâdegânıyla mu’ammer kıl
Ki halka kasd-i terfîh ile lutfı dâ’imâ geldi

Didüm târîhini şeh-zâde-i sa’d-ahterün Sâmî
Tevellüd eyleyüp âfâka sultân Mustafâ geldi

Sene 1129