Susan qız Şiiri - Sevinc Arzulu

Ayrılığa döz gəlin,
Demə bircə söz gəlin.
Yarın qoyub özgənin,
Yollarını pusan qız.

Unutma heç dününü,
Avazını, ününü.
Övkəsini,kinini,
Bircə anda qusan qız.

Sən hamıdan əzəlsən,
Həm şeir, həm qəzəlsən.
Gözəllərdən gözəlsən,
Bəzənməkdən usan qız.

Uzaqlaşma, bir dayan,
Məqsədim sənə əyan.
Həyat böyük okean,
Bircə damla susan, qız.

Dünyanın xoş günündə,
Qəm duyular ünündə.
Həqiqətin önündə,
Danışmayıb susan qız.