Sevda gülüm Şiiri - Sevinc Arzulu

Kimsə gəlməz harayıma,
Saçı uzun darayıma.
Qırx qıfıllı sarayıma,
Sevda ünüm, açarsanmı.

Dəli könül, bir azca dur,
Səslənir bax, “Bayatı-Şur”
Yer üzünə bəmbəyaz nur,
Sevda günüm, saçarsanmı.

Dərdi-qəmi ovutmağı,
Xatirəni uyutmağı.
Olanları unutmağı,
Sevda dünüm, bacarsanmı.

Al güllərin qəh-qəhindən
Bal dillərin bəh-bəhindən.
Bülbüllərin cəh-cəhindən,
Sevda gülüm, açarsanmı.

Dəniz kimi çağlamağa,
Bulud kimi ağlamağa.
Pislikləri bağlamağa,
Sevda tülüm, naçarsanmı.

Həyat nədir, yaşam nədir,
Fələk istədiyin edir.
Kim tutulsa sənə, gedir
Sevda ölüm, qaçarsanmı.

Ayrı düşməm Xəzərimdən,
Uzaq etməm nəzərimdən.
Dəniz-gölün üzərindən,
Sevda külüm,uçarsanmı.
Göy suları qucaqsanmı.