Ser-efrâz-i Şeref-bahşâ-yi Taht-i Âl-i ‘ ...

Ser-efrâz-i şeref-bahşâ-yi taht-i âl-i ‘Osmânî
Hudâvend-i mu’azzam tâcdâr-i memleket-pîrâ

Cihânbân-i memâlik şevket-i Dârâ vü İskender
Musahhardur ser-â-ser emr-i ‘âlî-şânına dünyâ

Şehenşâh-i serîr-efrûz-i iklîm-i ‘adâlet kim
Muvaffak eyledi tedbîrini takdîrine Mevlâ

O dem kim tâli’ oldı maşrık-i ‘izz ü sa’âdetden
Şu’â’-i ‘adl ü dâdı dehri pür-nûr itdi ser-tâ-pâ
Merâyâ-yi kulûba gerd-i gamdan incilâ geldi
Cihândan zulmet-i zulm in’idâma tutdı yüz hâlâ

Cenâb-i hân Mahmûd ibni sultân Mustafâ k'oldur
Sipihr-i ma’deletde âftâb-i burc-i isti’lâ

Teferrüd eyledi nâmı gibi zât-i hümâyûnı
Olup silkü'l-le’âl-i saltanatda gevher-i yektâ

O sultânü’s-selâtîn-i ‘avâkıb-bîn-i kâr-âgâh
Vezîr-i sâbıkun çün hükm-i ‘azlin eyledi icrâ

Tasavvur eyler iken hazret-i Hakka teveccühle
Münâsib sadr-i a’zam itmege kimdür diyü âyâ

Sürûşân-i İlâhî kıldı gûş-i kalbine ilhâm
Olup mülhem o şâhenşâh-i sâhib-himmet-i vâlâ

Vücûh ile sezâ-yi mühr-i ikbâl oldugın bildi
Semiyy-i şîr-i Hak ser-’asker-i Tebrîz ‘Alî paşa

Getürdi eyleyüp Tebrîzden da’vet sa’âdetle
Yed-i iclâline mühr-i şerîfi eyledi i’tâ

Murâd üzre vekîl-i mutlakın buldı mübârek-bâd
Henûz ol pâdşâh-i kadr-dân-i ‘âkil ü dânâ

Müşîr-i bî-nazîr-i sadr-i kübrâ-yi vekâlet kim
Olur şemşîr ü hâme kârger destinde bî-pervâ

O düstûr-i ‘aliyyü'ş-şân-i pür-cûd ü semâhat kim
Vücûdın eylemişdür hazret-i hallâk-i bî-hemtâ

‘Adâletle sahâvetle fetânetle şecâ’atle
Büzürc-i mihr ü Hâtem Bû ‘Alî-i mihrbân-sîmâ

Vezîr-i sâf-tıynet âsaf-i gayret-keş-i devlet
Müzîl-i nâm-i rişvet kâm-rân-i sadr-i istignâ

Safâ-yi tab’ ü tûl-i ‘ömr ile mahfûz idüp zâtın
Hudâ a’dâ-yi bed-hâhın ide nâ-bûd ü nâ-peydâ

İdince gûş teşrîf-i kudûmun sadr-i kübrâyı
Eyâ sâhib-nigîn-i kâm-bîn-i mesned-i ‘ulyâ

Alup deste kalem Sâmî-i muhlis ‘abd-i dergâhun
Du’â ile sürüp yüz hâk-i pâya eyledi inhâ

Hemîşe devletün mes’ûd kılsun Hak didüm târîh
Vekîl-i pâdşâhî oldı mühr ile ‘Alî paşa

Sene 1144