Senli günlerim Şiiri - Sevinc Arzulu

Sevəndə sevgini duyanın olsun,
Çətində həm arxan.həyanın olsun.
Səsini aləmə yayanın olsun,
Qaldı yalnız mənə bəmli günlərim.

Sevda yuxusundan oyan,sevgilim.
Günəş işığına boyan sevgilim.
Getməyə tələsmə,dayan sevgilim.
Başlanar yenə də qəmli günlərim.

Var qəlbimin sağalmaz bir yarası,
Təkcə sənsən hər dərdimin çarası.
Səninləyəm,ay gözümün qarası,
Sənsizdir gözləri nəmli günlərim.

Qocaldıq belə tez zaman içində,
Şübhələr,bəlkələr güman içində.
Azdım öz yolumu duman içində,
Çiskinli günlərim,çənli günlərim.

Həsrətin qəlbimi salıbdır oda,
Heyf ki ömrümü mən verdim bada.
Sevinc deyər yenə düşübdür yada,
Şirin xatirəli sənli günlərim.